Minister Dangui Oduber: Dentro di poco lo inicia Fact-Team

Aña pasa durante conferencia di prensa Minister di Salubridad Publico Dangui Oduber, a menciona cu Gobierno ta trahando riba un solucion pa atende cu e personanan cu ta sufri di salud mental manera psikiatria y/of droga adiccion.

Segun e comunicado cu Bon Dia Aruba a ricibi ta bisa cu den pasado nada a wordo haci pa atende cu e personanan aki cu mester di un ayudo profesional. E mandatario a splica cu a haci varios estudio, a cera MOU cu Mental Health Caribbean, a haci conferencianan cu tur profesionalnan local riba e materia y na final Gobierno a pone e fondonan disponibel. Dentro di poco lo inicia e Fact-Team cu lo bay duna asistencia ambulatorio na e casonan cu ta trata di personanan cu ta sufri di salud mental manera psikiatria y/of droga adiccion, asina e mandatario a trece dilanti.

E Fact-Team lo cay bou encargo di Sociaal Psychiatrische Dienst (SPD) cual ta un departamento cu ta resorta bou di DVG. Lo introduci un linea central di contacto pa pueblo of famia por yama pa raporta casonan di personanan cu ta sufri di salud mental manera psikiatria y/of droga adiccion. Trahando na e forma aki tambe e cliente ambulante lo ta den bista di profesionalnan pa asina por actua lihe den cualkier caso di crisis y/of emergencia.

Trabou di e Fact-Team

Fact-Team ta un ekipo cu ta bay sali riba caya y brinda e cuido y servicio na tur e personanan cu ta sufri di problema mental y adiccion. Por ehempel ora cu SPD haya yamada, e Fact-Team aki lo sali bay na e direccion y haci un opname y mira e situacion. E enfoke di e team aki lo ta pa yega mas cerca di e adictonan ambulante pa asina duna nan e guia y ayudo den nan contexto. Si ta un situacion di tal gravedad e persona lo mester wordo interna na Respaldo. Si ta trata di un adicto e tin cu sigui un tratamento pa adiccion. Si e persona ta sufri di ambos e Fact-Team lo scoge e problema mas serio na e momento eynan pa atende cune. Esaki ta loke e trabou di e Fact-Team lo ta segun Minister Dangui Oduber.

Finalmente Minister Dangui Oduber a splica cu tur esaki ta forma parti di e plan di maneho di integracion di psikiatria y adicion riba e tereno di Salud Mental y ta parti tambe di e Crisis Plan Social. Di e manera aki e Gobierno un biaha mas ta demostra cu e tin e interes di e ser humano central.