Siman pasa, minister di Turismo y Salubridad, Dangui Oduber, a indica cu posicion di Director Financiero lo ser yena e siman aki, cu un Arubiano lo firma contract laboral cu hospital.

Den un relato na e corant local Diario, e mandatario a haci referencia na un carta cu a manda pa hunta directivo di hospital expresando su malcontento cu e maneho di hospital, mirando varios problema cu tabatin na fin di aña pasa.

“Tabata tin cartanan tambe di specialistanan, kende a expresa nan malcontento riba e situacion preocupante na hospital. P’esey mi a manda un carta pa e Raad van Toezicht pa pidi nan pa entrega nan retiro”, Oduber a expresa. “E statuut no ta permiti Gobierno pa retira e miembronan di Raad van Toezicht”.

Segun e mandatario, Asociacion di Specialista a entrega un mocion di desconfiansa contra hunta di maneho, cual actualmente ta consisti unicamente di Ezzard Cillie, director medico kende recientemente a entrega su retiro.

“E unico motibo pakico Cillie ta canando rond ainda na hospital ta pasobra e Raad van Toezicht ta buscando un reemplasante temporal pa fungi como un director medico interino, pa hospital no keda sin bestuur,” Oduber a bisa Diario durante un conferencia di prensa.

Alabes e mandatario a anuncia cu a yena e vacatura di Director Financiero cu un persona local, kende e siman aki lo firma contract cu hospital. E persona lo asumi su cargo oficialmente dia 1 di april proximo.

Oduber a expresa cu e hunta directivo di hospital a compromete nan mes na entrega nan retiro, na februari, maart y april respectivamente, ya cu ta tres persona cu lo retira. “Gobierno ta bay haya espacio pa bin cu un hunta di supervision nobo y cambia maneho na hospital”, y lo busca un director general pa hospital, segun e mandatario.