E siman aki, Minister Dangui Oduber den presencia di tur stakeholder den salud na Aruba y tambe PAHO y WHO a lansa oficialmente e Plan Nacional di Prevencion den Salud.

E plan aki ta conforme programa di gobernacion y ta un plan integral caminda tur stakeholder a haya participacion. Segun un comunicado di gobierno, e plan aki ta wordo carga pa e field y esaki ta sumamente importante.

Ta di sumo importancia pa ehecucion di e plan aki pa tin e instrumentonan y proyectonan pa haci e plan aki uno exitoso.

Considerando e importancia di e plan aki for di hopi tempo minister Oduber a introduci un proyecto piloto yama Hoben Activo y Hoben feliz. E proyecto aki ta brinda oportunidad na muchanan y hobennan pa despues di orario di scol participa gratis na diferente disciplina di deporte.

E encuesta di salud cu a conduci na aña 2017 a indica cu solamente 50% di hoben y adultonan ta participa activamente na actividadnan fisico. Un ser humano mester participa tur dia por lo menos 30 minuut na un actividad fisico. Den cuadro di esaki, e meta di e proyecto aki ta pa stimula participacion activo di nos muchanan y hobenan na deporte.

Segun e comunicado, Oduber kier stimula y motiva nos comunidad pa biba saludabel, come saludabel y haci ehercicio.

Manera e proyecto aki lo bini hopi otro proyecto pa asina ehecuta e plan nacional di prevencion. “Un comunidad saludabel ta aumenta e productividad, ta reduci absentismo na trabou, tin un comunidad mas feliz y menos gasto pa fondo di AZV”, e comunicado ta finalisa.

LEAVE A REPLY

Please enter your comment!
Please enter your name here