Minister Dangui Oduber: SVb na Eagle ta bay haya un renobacion y expansion

Diaranson atardi, Minister di Salubridad Publico, Dangui Oduber a acudi na Banco Social di Aseguradonan (SVb) na Eagle, pa anuncia e renobacion y expansion di e oficina.

Segun un comunicado di gobierno, e mandatario a duna un discurso den cual a enfoca riba e necesidad di e renobacion y expansion di e edificio di SVb na Eagle. “Na momento cu mi a drenta den e gobierno, mi tabata na altura di e situacion di escasez den espacio pa traha cu SVb tabata haya su mes den dje” e mandatario a expresa. E la pidi director di Svb pa pone como prioridad pa percura pa Svb haya un edificio nobo y tambe renoba e edificio existente. Esaki ta hopi importante pa e trahadonan tin un espacio comodo pa por haci nan trabou. “E hende pa e gobierno aki ta central y Oduber ta contento con Svb ta wordo maneha y dirigi pa a percura pa nan haya un edificio nobo. E gobierno aki a cumpli cu deseo di e trahadonan.”
Oduber a anuncia cu e trabounan di expansion lo inicia na maart 2020 y lo termina pa fin di aña 2020. E inversion di e expansion den su totalidad incluyendo muebleria y ekipo ta calcula di costa entre 6 pa 8 miyon florin y despues ta sigui cu e restructuracion di e edificio existente.

Oduber a menciona cu e proximo añanan SVb ta bay innova den su structura di trabao, pasando di un organisacion basa riba funcionnan, cu un herarkia fuerte y centralisa, pa un organisacion basa riba rolnan, un herarkia menos fuerte y mas descentralisa. Ta p’esey e intencion ta cu e diseño di e muebleria lo ta asina cu e ta consistente na e desaroyonan interno pa futuro. E espacio di trabao cu ta bay crea ta bay cuadra cu e transformacion cu SVb ta bay ta traha riba dje den e periodo 2020-2025.

“Mi ta contento di mira cu SVb su ambicion ta pa crea espacio di trabao di calidad, y cu ta den linea cu principionan di organisacionnan moderno y flexibel, empoderando e trahador lo mas tanto posibel, dirigi riba aumenta e calidad di servicio pa e clientenan. Loke ta remarcabel ta cu SVb tin un porcentahe di 80% di empleado cu no ta meld AO” segun Oduber. Finalmente Oduber a gradici y desea tur e empleadonan di SVb exito den nan funcion.