Ayera mainta, durante un conferencia di prensa cu minister di Salubridad y Deporte, Dangui Oduber a ofrece, el a trece dilanti un update tocante e crisis cibernetico na Hospital Dr. Horacio E.Oduber y situacion actual cu Conseho di Supervision y Hunta Directiva.

Manera ta conoci, tres siman pasa Hospital Dr. Horacio E. Oduber a sufri un atake cibernetico di parti di un grupo Ruso y nan a pidi un rescate di 250.000 dollar pa entrega e informacion cu a wordo ‘encrypted’. Na e momentonan ey, Gobierno hunto cu departamentonan concerni a reuni pa atende e situacion cu a surgi.

Nan a nombra un crisis manager na hospital, cu ta Ronnie van Trigt y su funcion ta wordo encarga pa un luna cu e posibilidad di extende e tempo. Esey ta depende riba e rapport cu e ta duna di e situacion. Na e momentonan aki Oduber a splica cu entre 50 pa 60% di e data ta sigur, 40% di e data ainda ta perdi y hospital ta bezig pa set up un netwerk completamente nobo. Naturalmente esaki lo trece un impacto financiero basta grandi.

Tambe, Oduber a anuncia cu desde hopi tempo a surgi un situacion na hospital cu Gobierno no ta contento cu e funcionamento di Conseho di Supervision. Nan a pidi den un comunicado di prensa pa nan tuma retiro. E conseho aki ta consisti di 7 miembro, den cual Gobierno ta nombra dos miembro so.

Di mesun manera, el a laga di conoce cu diaranson pasa, Gobierno a manda un carta oficial basa riba un gran cantidad di topico cu e mes a elabora, pa nan por reflexiona riba nan responsabilidad y cuido medico, kico nan a haci pa drecha e situacion y pa nan mes saca e conclusion y entrega nan retiro, asina duna Gobierno posibilidad pa nombra un ekipo nobo.

Tambe el a comenta cu desde luna di april, e Asociacion di Specialistanan di Aruba a manda un otro carta cu por considera esey como un mocion di desconfiansa den maneho di hospital cu Conseho di Supervision, cu ta esunnan cu mester controla e Hunta Directiva, y esey no a sosode.

Tocante esey, Oduber a declara cu esaki no ta un situacion comun na hospital, pa motibo cu tin hopi disgusto y malcontento, no tin cambio ni mehoracion cu mester tin di parti di Gobierno. Tambe a menciona cu den e carta di Asociacion di Specialistanan tin e nombramento di director financiero, cu aña pasa e Hunta di Supervision mes a dicidi di kita Theo de Koole, ken tabata cumpli e funcion ey. Esey mester di suficiente base pa kit’e y mester tin un back up plan pa cuminsa cu e seleccion di otro director financiero nobo.

Di loke ta trata e funcion aki, Oduber a bisa cu te ainda e vacatura aki ta bashi y ta menciona cu esey ta ‘algo hopi iresponsabel di Conseho di Supervision’, cu nan ta laga un organisacion asina grandi cu mas di mil empleado sin un director financiero.

Asina mes, Oduber a comenta cu hospital a opera unicamente e ultimo aña cu director medico, cu no tabata esun mas apto pa guia hospital, segun e mes a sigura, pa motibo cu na momento cu hospital a haya e atake cibernetico, ni e Conseho di Supervision ni Hunta Directiva no por maneha e situacion di crisis pa via di atake aki.

Mirando henter e situacion ey, cu den hospital mes no tin confiansa mas den e maneho di Conseho di Supervision y Hunta Directiva,specialistanan tampoco tin e confiansa, sindicato tambe a expresa nan mal contento. Bon Dia Aruba a puntra pa Oduber ki pasonan Gobierno lo sigui si e situacion ta sigui di manera aki, cu Conseho di Supervision ni Hunta Directiva ta ofrece nan retiro. El a contesta cu aworaki pa via di e carta cu tambe nan a manda pa gobernador, mirando e situacion cu hospital tin ainda, el a expresa cu e no ta kere cu despues cu Gobierno di Aruba y minister di Salud a dirigi un carta pa tur miembronan ey, a pesar di esey nan ta dicidi pa keda. Si nan tuma e decision ey, nan ta haci nan mes hopi mas culpabel di loke ta pasa na hospital.

LEAVE A REPLY

Please enter your comment!
Please enter your name here