Diaranson mainta Minister di Cultura tabata presente na Steenweg 19 pa entrega di e finalisacion di e casco di e ex-edificio di Botica Aruba. Directora di Stichting Monumenten Fonds Aruba (SMFA) Sra. Anne Witsenburg a hiba palabra y a splica riba e proyecto di restauracion aki. E restauracion den e caso particular aki tabata solamente di e parti exterior. E motibo pa esaki ta cu ainda no tin un huurdo pa e edificio.

Una bes logra yega na un acuerdo di huur a largo plaso SMFA lo sigui cu e siguiente fase di e proyecto cual lo ta e renobacion di e parti paden di e edificio segun e necesidadnan di e huurdo

E edificio na Steenweg 19 ta un monumento proteha cu a wordo construi na aña 1925 pa Addison Winfield Croes.

Na aña 1935 hunto cu Gustave Nouel a cuminsa cu Botica Aruba den e edificio y esaki a keda fungi como botica te na aña 1985. Despues Palais Hindu a cumpra e edificio y na aña 1993 ‘El Mercado’ a habri su portanan. Despues di algun aña cu e edificio a keda bashi y tabata core e peliger di por wordo bendi y basha abou, SMFA a tuma e decision na 2015 pa cumpra e edificio cu e meta pa preserva esaki pa futuro generacionnan.

 

Despues cu e edificio a conoce varios cambio durante añanan, cu e restauracion aki SMFA a hiba e exterior di e edificio bek na su forma original. Cu e adaptacionnan aki e edificio a haya entre otro su balcon bek, decoracionnan y popchinan a bin bek pero tambe e decoracion di palo conoci manera ‘Gingerbread’.

Minister di Cultura Xiomara Maduro den su presentacion a trece dilanti cu cada biaha cu nos restaura un monumento na pais Aruba, nos como pais, como pueblo ta haya e oportunidad di por haya sa su historia. Un monumento cada bez cu e wordo restaura den su gloria e ta conta nos su historia.

E mandatario encarga cu cultura a gradici Stichting Monumenten Fonds Aruba pa e trabao y insistencia pa cu edificio aki na Steenweg 19 wordo restaura den su gloria. E parti exterior a wordo restaura, e casco ta drecha y awo ta enespera pa esun ta inspira pa huur e edificio aki y desaroye, un edificio monumental cu su seyo proteha cu un historia special.

Cada bez cu restuara un edificio monumental esaki ta motiva nos y esnan den priva tambe pa restaura mas edificionan monumental. Cu e proyecto aki, un otro monumento ta wordo scapa di wordo deteriora. Tin hopi mas edificio cu nos por yuda restaura, pero e fondonan no ta facil pa yega na dje y den esaki SMFA a bin ta haci un trabao pa 25 aña pa percura pa nos monumentonan por conta nan storia. Na final Minister Xiomara Maduro a gradici Stichting Monumenten Fonds Aruba, nos architectonan y tur esnan encarga cu e trabao di construccion y ta spera cu proximamente nos por haya conoce un huurdo pa e edificio aki.

LEAVE A REPLY

Please enter your comment!
Please enter your name here