Wardacosta di Reino pa Caribe lo amplia su capacidad di personal mas tanto cu ciudadanonan di e islanan

Segun e plan a largo plaso di personal, e LTP-P, Wardacosta pa Caribe Hulandes lo crece na un formacion cu ta permiti e entidad eherce su funcionnan 24 ora pa dia. Asina Minister di Defensa di Hulanda, Kajsa Ollongren a informa Comision Fiho di Defensa di Tweede Kamer.

E Minister a bisa esaki den su contestacion riba diferente pregunta cu miembronan di e comision a manda riba Wardacosta. Segun e Minister, e LTP-P ta describi den detaye con ampliacion den formacion, for di staff te na personal ehecutivo y inteligencia y cu esaki ta pone riba papel e sencia di e desaroyo di Wardacosta riba tereno di personal. Mientrastanto e trayecto di transicion a cuminza unda den proximo añanan ta premira un crecemento substancial di personal, cu pa gran parti y unda cu por, ta consisti di hendenan di e parti Caribense di Reino.

Ta Defensa ta aproba uso di Reaper

Pero Wardacosta a cuminza haci uso di tecnologia pa amplia su capacidad di control riba nos awanan y fronteranan. For di 2021 ta trahando cu drone chikito cu ta patruya riba tera y riba lama. Fraccion di VVD como tal kier sa si den futuro tin tarea pa e Reaper UAV pa sostene e trabou di Wardacosta den bringa traficacion di droga. Aki Minister Ollongren a bisa cu Wardacosta ta un organisacion di mantencion di ordo na nivel civil entre e cuater paisnan di Reino, y cu ademas di su tareanan pa Ministerio di Defensa den Caribe, tambe mester ehecuta otro trabou. Na e momentonan aki, Wardacosta tin seis (6) drones pa sostene su trabou pa haya bista riba kico ta pasando. E Reaper MQ09 ta medionan militar cu Defensa Hulandes a cuminza desaroya na Corsou como parti di un trayectoria di ta prepara. E MQ-9nan aki, cu ta un vehiculo aereo cu ta controla di distancia of por bula autonomo, ta na disponibilidad pa Wardacosta na momento cu haci un peticion na Ministerio di Defensa pa asistencia militar, Ollongren a splica.

Pa loke ta e ekipo di nabegacion, particularmente e fayonan den e botonan Metal Shark, Ollongren a bisa cu e botonan aki a keda cumpra conforme exigencianan di Wardacosta, pa medio di un proceso di Benta Militar Stranhero (Foreign Military Sales-proces), unda a bay den un adkisicion continuo hunto cu e Wardacosta Mericano. E fabricante a produci e botonan basa riba exigencianan determina, formula pa Wardacosta. Pero berdad a constata algun fayo na momento cu a cuminza usa e Metal Shark, por ehempel e balans y stoelnan cu “awor aki e fabricante ta trahando riba nan den colaboracion cu Wardacosta. E prome modificacionnan ta mustra positivo,” e Minister di Defensa Hulandes a splica.

Aruba y St. Maarten si ta paga

Un punto cu pa fraccion di VVD ta yega yamativo ta cu Corsou apenas na 2023 ta cuminza contribui na e presupuesto di Wardacosta y como tal tin pregunta riba e discrepancia cu St. Maarten y Aruba cu ya caba ta contribui financieramente.

Segun e Minister di Defensa Ollongren, den e LTP ta describi con ta bay reemplasa materialnan pa Wardacosta, incluso e gastonan financiero pa cada pais. A haci palabracionnan separa cu tur tres e paisnan riba ki tempo lo cuminza cu e contribucion financiero, tumando na cuenta e situacion financiero economico di Corsou, St. Maarten y Aruba na cuenta. St. Maarten a scoge pa cuminza cu su pago na 2021, Aruba na 2022 y Corsou na 2023. “Pero na final, Hulanda, Corsou, St. Maarten y Aruba ta paga hunto e sumanan cu segun e clave di division a acorda riba dje. E acuerdonan, cu ta inclui e palabracionnan di pago a keda acorda den Conseho di Minister di Reino di Mei 2021.

Locual a yama atencion ta cu den e plan anual ta menciona e reemplaso di dos di e total di ocho sistema di walradar na 2022 riba e islanan ABC y cu esey e sistema di control di radar ta completo.

 

Derecho Humano

Mientrastanto, pa e fraccion di Volt, e LTP y plan anual pa 2022 ta ilustra e tarea di Wardacosta pa intercepta personanan indocumenta cu ta drenta e paisnan den Caribe pa medio di contrabanda. Pero, tin hopi pregunta na Hulanda riba particularmente e trato cu e personanan aki, unabes cu a captura nan, ta ricibi, particularmente na Corsou. Es mas, miembro di Tweede Kamer Koekkoek a entrega un mocion riba e tema y aki, Gabinete anterior di Hulanda a contesta cu den Reino Hulandes mester respeta y proteha derechonan humano na tur momento.

Segun e Minister di Defensa, ta trata aki un responsabilidad di Minister di Interior y Relacionnan di Reino, pero gabinete Hulandes ta para fuerte cu combersacionnan entre Hulanda y Corsou riba e forma con Hulanda lo sigui brinda sosten cu e migracion for di Venezuela, ta basa riba resultadonan concreto y mehoracion.

A constata na fin di 2021 cu Corsou no a mustra suficiente adelanto den garantisa un ambiente humano pa stranhero den e facilidadnan di detencion cu a keda amplia y adapta. Aunke cu e expansion do capacidad material pa cuido/detencion di stranhero indocumenta a haya forma cu sosten di Hulanda, e ta keda importante pa Corsou keda enfoca cu energia riba asuntonan manera busca y prepara personal apropia, organisa actividadnan pa esnan den e centronan, y brinda nan e garantia pa acceso na sosten huridico, pa asina realmente mehora e circunstancianan den e facilidadnan aki. Secretario di Estado pa Relacionnan den Reino Alexandra van Huffelen a papia riba e tema aki cu Prome Minister di Corsou, y awor tin discusion entre e dos paisnan riba e pasonan cu Corsou tin pensa pa tuma pa mehora e situacion pa e stranheronan indocumenta. Despues lo mira con Hulanda lo por sostene e plannan aki, bou condicion cu nan ta garantisa e standardnan di derecho humano. “E evaluacion di e efectividad y eficiencia di e diferente aspectonan cu e sosten di Hulanda a trece cune lo sosode durante e revisionnan di maneho na e departamentonan Hulandes envolvi. E revision ta tuma luga di parti cada departamento,” Ollongren a splica.

Trato humano na migrantenan

Ademas el a bisa cu Wardacosta pa Caribe ta un relacion di cooperacion cu ta duna contenido na e interes comun di e paisnan den Reino pa actua determina y efectivo riba lama, riba e tereno di mantencion di ordo. Wardacosta ta eherce, denter di prioridadnan di e plan di maneho hudicial, tareanan di investigacion, supervision y di servicio pa e paisnan. E autoridad riba e tareanan investigativo, policial ta cay bou e Procuradornan General di Aruba y esun di Corsou, St. Maarten y Islanan BES. E migrantenan deteni ta bay na un di e tres puntonan maritimo di Wardacosta, cu ta Corsou, St. Maarten y Aruba. Autoridadnan policial di cada pais ta keda encarga cu e migrantenan, y cada pais ta responsabel pa e procedura di admision, segun palabracionnan den Reino. Ta durante e trayectoria di aplica e proceduranan ta determina kico ta e status di estadia di cada migrante y/of si nan tin derecho riba proteccion a base di asilo.

Minister Ollongren finalmente enfatisa cu Wardacosta, den su funcionamento ta atene su mes na e balornan nucleo di integridad, profesionalismo, transparencia, no ta discrimina y basa riba e legalidad di tur accion. “Wardacosta ta carga esakinan hopi activo y ta sigui tur e balornan aki. E medionan legal, proceduranan y obligacionnan na momento di eherce e tareanan riba lama, ta conoci cerca e personal ehecutivo di Wardacosta. Dos trahado di Wardacosta hunto cu representantenan di e partnernan den e cadena di inmigracion a haya cursonan pa bira trainer di ‘hostmanship’ di parti di e Direccion di inmigracion di Hulanda, IND. E trainernan aki a instrui regularmente e personal di Wardacosta, como tambe e otro partnernan den e cadena di inmigracion riba con ta acerca y atende cu migrante,” Ollongren a enfatisa. “Locual ta para central aki ta e actitud cu e personal di Wardacosta ta tuma y ta siña nan pa mira e acercamento for di e perspectiva di e migrante. Mester tin comprension y empatia pa e motibonan di e persona pa tuma risico pa sali di su pais,” tabata e mensahe di Minister di Defensa di Hulanda riba e maneho di Wardacosta riba migrantenan cu ta drenta e islanan den forma ilegal.

LEAVE A REPLY

Please enter your comment!
Please enter your name here