Minister di Deporte ta anuncia inicio di auditoria oficial den Fundacion Facilidadnan Deportivo

Ayera mainta minister di Deporte Gerlien Croes a tene un conferencia di prensa pa brinda un actualisacion tocante e situacion andando pa loke ta trata Fundacion Facilidadnan Deportivo (FFD). Un situacion, cu segun el a indica, a conduci na realisa un audit oficial pa mira kico ta e situacion y kico ta e decisionnan cu lo tin cu tuma.

E mandatario a splica cu desde nan entrada como gabinete tin varios situacion cu nan a enfrenta y hereda tocante desaroyonan den diferente area, pero specificamente tambe den e area di deporte.

El a sigui splica cu ya ta dos siman y mey, casi tres, cu el a haci un entrevista tocante consternacionnan cu tabatin di haber cu, entre otro, e facilidad deportivo na Simoen Antonio.

Minister Croes a indica cu nan a inventarisa tur e desaroyonan di e ultimo añanan, a inventarisa e situacion actual y a base di esaki nan a bin encontra documentonan, como tambe hopi indicacion cu ta duna e necesidad pa haci un inventarisacion debido den diferente fundacionnan cu ta activo den e area di deporte.

El a remarca cu den 2018 nan a encontra un situacion, algo cu el a menciona nan no a haya for di e gabinete saliente ni minister saliente pero for di personanan den comunidad cu tin varios documento cu a yega cerca gobierno, cu tabata indica di un overview cu a ser haci e tempo ey door di PWC na 2018 pa locual ta specificamente e Fundacion Facilidadnan Deportivo (FFD).

E mandatario a splica cu esaki ta duna di conoce cu tabatin e tempo ey caba indicacion cu tin un necesidad urgente pa haci cierto cambionan of inventarisacionnan financiero, di maneho, di e situacion di e trahadonan di e fundacion aki cu nunca a haci.

El a indica cu no ta desconoci cu despues di 2018 te cu aworaki situacionnan a presenta den diferente di e fundacionnan cu mester a atende cune.

“Manera nos a priminti di haci, nos ta cumpli. Den tur area mester tin un good corporate governance y esey ta conta tambe pa fundacionnan cu ta maneha locual ta finanzas den deporte. Varios di e fundacionnan aki ta haya subsidio di gobierno di Aruba. Mas cu solamente e aspecto financiero tambe nos mester por wak y sa si e fundacionnan aki cu ta ser destina pa e veldnan di deporte, den e caso aki pa facilidadnan y maneho di facilidad, si debidamente e fundacionnan aki ta logra ehecuta pa yega na nan meta tambe,” minister Croes a subraya.

El a splica cu nan a identifica bastante reto y situacion. El a menciona cu e parti di Simoen Antonio ta conoci caba, pero tin un situacion na Frans Figaroa tambe cu segun el a indica e veld pa hopi aña caba no ta apto pa e weganan cu ta tumando luga ey riba, y e situacion cu Joe Laveist cu tambe ta cera.

“Asina mi por sigui menciona e lista. A identifica algun reto mas unda cu nos a haya suficiente motibo pa inicia un inventarisacion pa loke ta e maneho di e fundacion aki,” el a remarca.

E mandatario a sigura cu mas informacion y detayes di esaki lo bin na cla ora cu e rapportnan keda cla den e proximo simannan y na momento cu ta asina leu lo comparti e informacion cu comunidad den tur transparencia, cual el a enfatisa ta un punto cu gobierno lo cumpli cune tambe.

“Cada florin cu e gobierno aki ta saca for di su caha ta un florin di e pueblo aki y na final di dia locual nos ta destina pa comunidad, y den e caso aki pa e desaroyo di nos muchanan y hobennan den e area deportivo mester ser destina debido, pero tambe e mester logra of yuda logra yega su meta,” el a agrega.

E inventarisacion di FFA lo ser lidera door di CAD, hunto cu mas partner pa asina purba acelera e proceso y tin un bista cla di tur e desaroyonan di e ultimo añanan den e fundacion menciona.

Respondiendo na pregunta di prensa, minister Croes a splica cu e fundacion aki ta ser subsidia cu un cantidad cuantioso di fondo, casi tres miyon cu e fundacion aki ta ricibi, pero facilidadnan deportivo mes no ta den funcion.

El a remarca cu e meta cu e fundacion aki ta pa e mantencion di e facilidadnan y si e facilidadnan no ta den funcion preguntanan ta bin dilanti tocante kico ta pasando pasobra e fundacion tin un obhetivo, pero no ta alcansando esaki. Ademas di esaki, el a menciona, a bin un discusion tambe entre e FFD y Fundacion Lotto pa Deporte (FLpD) tocante un acuerdo cu nan tabatin y cu segun FFDA a ser parcialmente cumpli, pero FLpD tin un argumento diferente.

“Poco poco bo ta haya indicacion cu no ta solamente e situacion financiero ta un reto, pero tin mas reto. Entre otro pa locual ta trahadonan tambe. Cierto momento a surpasa e limite di hende cu por traha eynan, e gastonan di trahadonan ta hopi pisa,” el a bisa.

El a agrega cu nan a identifica tambe cierto manera cu decisionnan ta ser tuma of comunicacion cu tabatin, cambio di directiva y decisionnan cu a ser tuma tambe durante reunionnan di directiva.

Na mesun momento minister Croes a brinda un clarificacion riba un otro situacion cu nan a encontra relaciona cu un proyecto riba e tereno situa parti patras di centro deportivo na Santa Cruz.

E mandatario a splica cu tin un proyecto cu e minister saliente a laga atras cu lo mester tabata pendiente di ehecucion pero ora cu a inicia e proceso di haci e tereno aki limpi, a bin haya un hayasgo grandi archeologico.

El a sigui splica cu na momento cu esaki sucede mester a yama tur e partnernan aden y mester a sinta na mesa pa identifica kico ta sucediendo, y na mesun momento tambe haya mas informacion di e proyecto mes, di e proceso di e poryecto, dicon esaki a encamina, e fondonan destina pa esaki, e materialnan cu tin cumpra, etc.

Minister Croes a indica cu e tereno en cuestion ta cay bou di ASU, cu ta e fundacion cu ta maneha esaki, pero el a agrega cu nan a encontra cu e situacion cu pa motibo desconoci no tabatin tur e permisonan na luga pa por a inicia cu e trabounan menciona y e peticion a bin parti di Gabinete AVP-FUTURO pa pone e proyecto aki on hold pa aworaki.

El a indica cu e siman aki lo tin reunionnan cu lo tuma luga cu e departamentonan concerni, DIP, Departamento Archeologico, ASU, pa yega na un solucion.

E mandatario a agrega cu esaki ta nifica tambe cu mucha y hobennan cu tabata haci uso di e tereno aki temporalmente, pa motibo cu e parti di atletismo di Stadion Guillermo Prospero Trinidad no ta full cla, ta en espera di un contesta di kico ta bira un solucion temporal pa nan por sigui train.

“Tin hopi mas desaroyo cu mi lo sigui comparti den e simannan binidero, pero mi ta sigur cu e ta na mi deber pa anuncia y comunica cu comunidad cu despues di tur locual cu nos a encontra nos mester busca solucion y pa busca solucion mester tin un bista cla di kico e situacion ta di berdad y a base di esey e inventarisacion a inicia na FFD,” el a finalisa.