Den ultimo dianan, comunidad a cuminsa bati alarma riba rednan social tocante uso di beach, cu pa via di algun proyecto of construccion, a keda ‘cera’ pa acceso publico.
Tambe tabata existi hende cu den un area specifico a cera e luga pa ‘mantene e area limpi’, como si fuera cu e beach tin un doño. Asina como tin cosnan poni cu no mester ta den e luga. Den caso aki, Minister di Desaroyo Teritorial, Infrastructura y Medio Ambiente, Marisol Lopez-Tromp a manifesta durante un conferencia di prensa cu ‘tur beach ta keda publico y esey ta encera cu pueblo semper por tin acceso na e beach of por ta riba e beach, a pesar cu tin cualkier construccion of proyecto’.
Tambe a sigura cu comunidad mester pidi e departamentonan concerni pa actua, pa motibo cu ley ta encera cu e beachnan ta publico.
