Minister di Economia y Finansa, Xiomara Ruiz-Maduro a reaccion pisa riba e ultimo carta cu e organo di supervision financiero CAft a emiti dia 20 di juni ultimo. E mandatario a cualifica e carta aki como un tipo di menasa, ya cu den dje CAft ta conseha pa Conseho di Minister di Reino bin cu un ‘aanwijzing.’

‘Aanwijzing’
Maduro a bisa cu nan ta reacciona ariba e ponencia di CAft, pasobra nan a indica cu nan ta bay pa Conseho di Reino, y cu esaki nan ta bay pidi un ‘aanwijzing.’ E ta haya cu pa medio di e carta aki CAft kier crea ‘ambiente innecesario’ rond di e situacion y maneho financiero di pais Aruba. Nan ta bisa cu gobierno no ta cumpli cu e LAft of ley di supervision financiero. Pero tambe cu gobierno no ta cumpli cu nan propio comptabiliteitsverordering, y igualmente ta referi na e parti di protocol.

Segun e mandatario, e contenido di e carta di CAft unda ta pidi un ‘aanwijzing’ ta un escalacion, y el a trece esaki dilanti den su carta di contesta. E ta mira cu si CAft tabatin mester di mas informacion prome cu a emiti su ultimo carta, nan por a papia cu pais Aruba den nan reunion regular di dia 27 cu 28 di juni. Pero CAft mes a manda carta bisando cu nan no ta bin despues cu e ley di LAft nobo a wordo trata na cuminsamento di luna den parlamento. El a agrega cu e ley di LAft ta para den articulo 8 cu nan por bin consulta tur e departamentonan cu nan a yega di consulta, y cu ‘gobierno no a bisa nunca cu nan no por consulta esakinan’.

Pero e ta haya cu CAft a scoge pa no papia cu pais Aruba, pero tampoco pa haci cu locual ley ta brinda nan. Sino cu –segun e mandatario- e colegio di supervision financiero a bay di biaha ‘over na manda un carta di menasa’. Pero tampoco a pone aden suficiente argumento, ni tampoco pone oido na locual gobierno a bisa. En bes di dos siman of 14 dia pa contesta, CAft a duna apenas 7 dia, pasobra e lapso aki ta cay net bon prome cu e reunion di Conseho di Minister di Reino, cu lo tuma luga dia 5 di juli awor, segun e mandatario (red: a base di art. 12 inciso 1, aparentemente CAft a mantene e limite di shete dia).

“Boso ta mira ta unda e weganan ta wordo hunga,” el a expresa. P’esey e mandatario tabata energico cu CAft a scoge pa bay menasa Aruba cu lo bay Conseho di Minister di Reino, caminda pa gobierno, tin puntonan di nan maneho cu por wordo discuti cu otro di un manera mas sano.

Reaccion riba recomendacion di CAft
Durante e conferencia di prensa aki, cual a dura casi dos ora, e mandatario a bay riba e recomendacion cu CAft a trece dilanti, entre otro, ta referi cu no tabatin suficiente informacion, of cu gobierno no a cumpli cu e recomendacion cu a wordo duna pa loke ta e norma di personal, reforma fiscal y gastonan di AZV.

Maduro a bisa cu nan ta bin dunando informacion na CAft y no ta por nada nan a yega di traha cuater carta unda nan ta brinda e informacion. Esaki den nan reunion na nivel gubernamental, pero tambe riba nivel tecnico. Den e carta cu e mandatario a manda diahuebs ultimo a yega di repasa riba nan. Pero ta CAft a dicidi pa para tur reunion te ora tin mas claridad cu Aruba.

Segun e mandatario, nan a respeta e decision aki ya cu tabatin cambio den e ley nobo di LAft te hasta constitucional cu lo wordo trata den e reunion venidero di Conseho di Minister di Reino dia 5 di juli venidero. El a agrega cu e ley aki no ta firma ainda, mientras cu CAft ta bin menasa Aruba cu un ‘aanwijzing’, siendo cu tampoco CAft no tin un base legal pa haci esaki.

E reaccion di e mandatario riba CAft su recomendacion number 5; ta asina cu CAft kier haya e plan integral di e reforma fiscal. Segun e mandatario, varios biaha den e reunionnan tecnico y den nan cartanan a yega di splica CAft cu e reforma aki ta ainda un ‘proceso cu nos ta aden’.

E ta un reforma cu ta bay den cuater fase, y nan ta bay pida pida, caminda cada biaha un parti di e reforma ta ser studia y nan ta haci analisis cu ta wordo comparti cu CAft tambe. “No ta un cos cu nan no a hay’e.” El a agrega cu mester tene cuenta cu nos capacidad limita, ya cu Aruba mes ta haciendo uzo di nan propio experto fiscal. Esaki debi cu bo no por pone un hende di afo pa traha riba algo cu mester por traha pa Aruba mes, segun Ruiz-Maduro.

Otro punto cu e mandatario a referi riba dje pa reacciona riba e carta ta e gasto di AZV. CAft a trece dilanti cu e gastonan di AZV, caminda e deficit ta birando hopi, y cu gobierno no ta haciendo un esfuerso pa actua. Segun Maduro, gobierno ta actua y lo haci un ‘audit’ of estudio interno riba e asunto aki; y nan a trata e asunto aki cu e minister concerni y te hasta na nivel tecnico.

Tambe nan a sinta cu AZV, unda hunto nan a yega na e conclusion cu nan proyeccion mester wordo adapta. Te hasta el a bisa cu a base di e prima di AZV y e BAZV di e ultimo lunanan tin un cambio cu ta faborece e presupuesto di pais Aruba. Es decir, cu e gasto ta mas abou y e deficit ta menos di loke a wordo premira y e no ta bay afecta e norma colectivo pa 2019. E ta haya cu esaki tabata e ‘miedo di CAft den esaki.’

E mandatario a bay den cada punto, cu ta parti di un carta di 6 pagina cu el a manda pa e colegio di supervision financiero aki, unda den nomber di gobierno di Aruba e ta duna un contestacion integral di e puntonan cu CAft a trece dilanti.

A pesar di e situacion cu a surgi, e mandatario no ta kere cu ta necesario cu nan manifesta un falta di confiansa riba e miembronan di e colegio di supervision den nan proximo reunion di Conseho di Minister di Reino. Pero si e ta kere cu nan mester bay den dialogo y esaki ta un di e punto esencial cu a bin den e carta cu el a manda pa CAft diahuebs ultimo.