Minister di Educacion, mr. Gerlien Croes, a firma un Memorandum di Entendimento (MoU) cu Husson University na Bangor, Maine, marcando un paso mas den e direccion di amplia e horizonte educativo pa nos hobennan.
E acuerdo ta habri porta pa mas oportunidad pa studiantenan Rubiano por sigui su estudio na un institucion di renombre den e estado di Maine, particularmente den area di tecnologia aplica, educacion y formacion pa maestro, STEM (Science, Technology, Engineering & Mathematics), programa di sostenibilidad, investigacion y otro colaboracionnan academico.
Minister Gerlien Croes a destaca cu esaki ta un alianza cu ta nace for di un bista amplio pa crea oportunidad real pa educacion pa futuro, pa prepara nos hobennan pa un mundo cambiando hopi lihe unda innovacion y conocemento ta clave.
“Nos ta traha cu vision pa duna nos hobennan acceso na mas oportunidad educativo, tanto localmente como internacionalmente. Esaki ta un ehempel di mi compromiso cu educacion y di tuma e prome paso pa hopi mas cu ta bin na caminda”, segun Minister Gerlien Croes.
E firmamento di acuerdo cu Husson University ta sigui poco despues di un otro acuerdo educativo internacional cu Minister Gerlien Croes a firma recientemente hunto cu Sunny New Paltz University of New York, reforsando e meta di Gobierno di Aruba pa fortalece laso cu institucionnan di enseñansa superior y crea ruta sostenibel pa desaroyo humano y profesional di nos hubentud. Un danki ta bay alabes na nos Minister Plenipotenciario na Washington DC pa yuda haci esaki un realidad.
