Minister di Enseñansa y Deporte Endy Croes a informa comunidad tocante ultimo desaroyonan cu ta bin tumando luga den area di enseñansa unda cu a papia tocante diferente tema, incluyendo e werksternan di SKOA.

Den un conferencia di prensa di diahuebs di siman pasa, minister Croes a trece dilanti cu manera comunidad a wordo informa par di lunanan pasa, ta existi un rapport di nomber “Doorlichting van het Arubaanse Onderwijsbestel” na unda cu den esaki a bin 13 recomendacion pa mehora calidad di Enseñansa na Aruba cu a wordo haci pa Inspectie di Hulanda y Aruba conhuntamente como parti di e pakete di reformanan.

Aworaki ta den e fase di tussenrapportage y segun minister Croes a indica, e obhetivo ta cu pa september di e aña aki lo tin e rapport final, unda el a bisa cu hopi lo no cambia pero e recomendacionnan den linea grandi lo keda esencial.

Den e desaroyonan cu ta tumando luga, el a señala cu leynan di enseñansa ta anticua caminda cu full e veld tin conocemento di esaki y tambe a wordo inclui den e rapport unda cu tin landsverordening di kleuter onderwijs, cu ta anticua y tampoco no ta existi otro tipo di leynan, como por ehemplo, beroepsonderwijs, entre otro, cu lo wordo revisa y mehora.

Asina mes, el a indica cu nan a contrata un profesor di Hulanda di nomber Luitsen de Vries pa forma un comision unda cu Directie Wetgeving en Juridische Zaken (DWJZ) tambe a pone un persona den comision aki ademas di Directie Onderwijs pa asina e comision por funciona trahando un skema cu tur e leynan aki cu por dura aproximadamente 18 luna.

“Instrui tur hendenan riba nan sector di kico ta verwacth di nan, a pone un timeline di kico nos a cana y mi por bisa cu e inicio tabata hopi alegre”, minister Croes a bisa.

Tambe, el a comparti cu recientemente e casa di de Vries a bira hopi malo pa motibonan di salud unda cu a fayece y e mester bay Hulanda back na unda cu a duna na de Vries espacio pa e por surpasa e mal momento aki y por bin back Aruba proximamente pa por continua cu e proyecto.

Den e recomendacionnan di e tussenrapportage segun minister Croes, nan a cuminsa tuma accion y a cuminsa contrata expertonan y pa den 18 luna por cana e caminda ey.

“Mi ta sigur cu na final di dia, e veld di enseñansa y stakeholders ta bay ta hopi contento pa cu e leynan modernisa, leynan anticua ta wordo revisa, leynan cu no ta existi lo wordo traha y enseñansa lo beneficia den totalidad al respecto di esaki”, el a declara.

Un otro recomendacion cu minister Croes a trece dilanti ta e maneho di idioma, cu manera el a expresa por ta algun lo pensa cu Hulanda ta bay scoge esaki pa Aruba lo cual no ta berdad, nan a bisa cu Aruba lo scoge lo cual ta miho pa Aruba y cu tin cu haci un escogencia cu no ta cla aworaki, a informa cu nan a crea un otro comision cu tin como lider expertonan di Directie Onderwijs cu e idea pa tur stakeholders participa, den ocho luna e rapport final lo ta riba mesa cu e consehonan crucial pa e ora ey tuma e decision, cana e proceso pa cu escogencia di maneho di idioma cu tambe a bin dilanti den e tussenrapport.

Minister Croes tambe a señala cu gobiernonan a cuminsa tuma direccion di un saam multilingual cu no a wordo implementa na tur scol unda cu nan ta reconoce tur e otro rapportnan di expertonan como por ehemplo, “Habri porta pa nos drenta” di aña 2002 y “Diversificacion di Idioma di Instruccion den Enseñansa Primario” cu a trece dilanti e problemanan aki “pero cu nunca como pais nos a tuma un direccion”, el a menciona.

Minister Croes ta espera cu na final di aña nan lo tin e recomendacionnan concreto pa e ora ey minister lo presenta den conseho di minister pa tuma e decisionnan den un tema cu hopi discusion riba dje pero cu a yega momento pa tuma decisionnan pa e porvenir di enseñansa.

“Nos ta premira tambe e maneho di idioma integral y despues nos lo bay pa e fase di implementacion”, el a comenta.

Ademas, el a informa cu un delegacion di Inspectie di Hulanda a bin Aruba par di siman atras cu a reuni cu Inspectie di Aruba y diferente stakeholders a convivi den un seccion na EPI ora cu e plataforma di Enseñansa y Labor pa wak con nan ta bay uni den un miho forma y con lo prepara studiantenan cu a caba nan estudio cu tambe ta forma parti di e recomendacionnan.

Asina mes, minister Croes a declara cu presupuesto pa enseñansa ta di 280 miyon florin, di e cual tambe a bin dilanti con cada stichting ta responsabilisa cu gobierno, pa motibo cu nan ta haya e placa y nan tin cu atende cu e placa ey, esey tambe ta preocupacion di Hulanda unda cu minister Croes a sigura cu nan a splica nan cu di acuerdo cu otro recomendacion den nan mesun rapport, nan a detecta algun deficiencia cu mester di atencion y cu mester bin cu un reglamento pa stichting por responsabilisa nan mes y ta algo cu nan a detecta cu ta falta oficialisa.

“Nos a contrata un compania register accounting experto, un team y hunto cu nan den caso aki nan a revisa e parti di e problema cu ya caba nos tin un tracker cu ta bezig atendiendo cu esaki”, minister Croes a manifesta.

Nan ta den trayecto di varios reforma cu ta forma parti di e Landspakket manera el a anuncia y cu tin di nan cu mester wordo discuti riba un nivel politico, debi cu tin cierto recomendacionnan cu ta bay exigi kisas mas hende na trabao cu mester hiba na decisionnan politico pa tuma decisionnan corecto pa no crea discusion.

Di loke ta trata e tema di werksternan di SKOA, el a expresa cu tin dos componente importante e cual ta pa nan no perde nan trabao y pa no aumenta schoolgeld, na unda cu den varios comision cu expertonan a sinta y a yega cerca na un pensamento cu “tur dos por carga” y cu esaki lo costa placa unda cu gobierno a aloca 1 miyon florin extra pa e proceso, mientras nan ta na den direccion pa haya un claridad den proximo seis luna atendiendo e werksternan tambe.