Profesionalisacion di trahadonan den mantencion y oportunidad profesional nobo. Esey ta meta di Openbare Avondleergangen Aruba, OAA, cu na September lo bolbe cuminza cu cursonan despues cu e instituto tabata keto pa un aña. Minister di Enseñansa Endy Croes ayera a bisa cu OAA mester a pasa den un restructuracion pa asina (sigui) ofrece curso y programanan na bienestar y demanda di mercado laboral, ofrece enseñansa practico y dynamico, ofrece programa personalisa, cu enfoke riba experiencia y duna perspectiva. Ela duna un historia di OAA cu ta e prome scol di ofishi tecnico di Aruba, y cu desde 1055 ta brinda enseñansa den oranan di anochi. E nomber OAA a bin na 1987 y desde 2009 ta resorta bou Servicio di Scol Publico, DPS..

Croes a bisa cu e kier pa OAA mes bin cu su conferencia di prensa pa duna mas detaye, pero en todo caso por informa cu entrante sea 12 of 18 di September cu e cursonan di asistente di electricista nivel 2, asistente di koelmonteur nivel 2 y e trayecto traha y siña nivel 1 (Leer Werk Traject, LWT) E cursonan aki ta organisa den colaboracion y cu curiculo di ROVC (Regionaal Opleiding en Vorming Centrum) di Hulanda mientras cu e LWT ta bou encargo di EPB. E LWT lo tin un duracion di un aña escolar, y lo ofrece cuater curso cu ta basico pa mecanico di auto, e conocemento basico di mecanico di mantencion, conocemento basico di trahado comercial y conocemento bastico di cuido di estetica fisico

E diplomanan ta reconoci na nivel MBO, y mas ainda ta reconoci pa Hulanda den caso cu sigui specialisa na Hulanda.

E Minister kier a enfatisa e lazonan cu ROVC cu ta brinda cursonan reconoci y como tal, ta trece esakinan na Aruba. Como tal entrante 2023 OAA lo brinda e curso di Trahado Administrativo General nivel dos y tres, nivel 1 te 3 pa lasmento, nivel 2 y 3 di mecanico y ‘opbouw,’ ademas di nivel 3 di ICT, esta tecnologia di Informacion y Computer. Tur esaki ta yuda e companianan cu ta activo den por ehempel servicio di airco, pa laga nan trahadonan sigui e cursonan pa asina por sigura cu nan ta prepara. “Nos kier yega na e situacion unda tur hende cu ta brinda e servicio di airco ta capacita y tin su carnet pa prueba esaki tambe,” Endy Croes, kende a agrega cu e deseo pa e certificacion pa por haci trabou tey. E lo no bira un ley, pero ciudadano mes lo por puntra si e trahadonan cu ta haci trabou di mantencion ta certifica.

E cursonan di OAA ta dura entre 6 luna pa 2 aña, cu un maximo di cuater les pa siman, cu ta encera cuater ora di les di 45 minuut pa anochi. E pasantia (stage) ta a base di e competencianan cu tin caba, pues experiencia di trabou.

Esnan cu por aplica ta hoben di 17 te cu adulto cu ta buscando trabou of kier redefini nan mes profesionalmente.

EPI

Mientrastanto EPI a haci peticion pa cuminza cu les dia 5 di September, despues di a pasa den proyecto di e Plan Strategico Nacional, NSP 1, unda a renoba 12 programa educativo. E Minister a splica cu cuater di e 12 programanan ta di SEPB, y 8 a keda renoba hunto cu SINOPS di Hulanda, den colaboracion cu DPS, Inspeccion di Enseñansa y SEPB. Awor ta den preparacion pa docentenan ta cla pa e inovacion cu a tuma luga. “Inicialmente e idea tabata pa cuminza cu 17 klas nobo cu 26 alumno nobo. Debi na peticion enorme di hopi studiante, a dicidi cu ta cuminza cu 21 klas nobo, 5 di e programa bieu. E ta nifica cu 780 alumno lo cuminza cu e prome aña di EPI, cu pronto lo celebra su 25 aniversario,” Endy Croes a splica.