Den un conferencia di prensa di minister di Enseñanza y Deporte, Endy Croes, cu a tuma luga ayera den oranan di mainta, e mandatario a señala cu mirando cu aña 2022 ta yegando na su final, tabata un aña cu hopi reto.

Di esaki, el a splica cu constantemente nan tabata den debate cu CAft cu Hulanda tocante aanwijzing, entre otro temanan. Tabatin un vision concreto y trabaonan fuerte tanto di prome minister Evelyn Wever-Croes como di minister di Finanzas, Xiomara Maduro caminda a logra domina e tema cu un deficit di 93 miyon den e presupuesto complementario.

El a trece e punto aki dilanti pa mustra con e aña aki tabata unda nan a logra diferente meta, el a informa cu e doorlichting a wordo entrega na su persona y na mita di november nan a manda nan reaccion riba esaki.

Den e rapport aki tin 13 tema cu ya caba a wordo atendi y hunto cu personal specialisa di Hulanda ta bay pone e pasonan concreto y definitivo mara tambe na fecha con nan ta atende cu esaki na futuro.

Aworaki nan ta den fase hunto cu ekipo di Hulanda pa traha riba e plan van aanpak di un uitvoeringsagenda entre otro, riba e parti di data, riba maneho di idioma, zoorg den henter structura di enseñansa y manera el a yega di bisa den mas di un ocasion “nos ta trahando caba, anticipando riba cambionan den ley di enseñansa, entre otro, landsverordening kleuter, landsverordening basisonderwijs, voorgezet onderwijs y tambe traha e leynan cu no ta existi pa beroep onderwijs unda nos tin EPB y EPI, dos scol grandi cu nunca tabatin landsverordening cu pa e temponan aki esey no por y tambe traha un ley pa Inspectie Onderwijs cu tampoco tabatin un ley di un landsverordening”, el a bisa.

Pa aworaki nan a compronde di profesor de Vries cu a bin diferente biaha na Aruba den aña aki hunto cu un ekipo cu a traha riba esaki cu pa januari 2023 ya caba ta entrega e prome ley cu ta full traha y skirbi cu articulonan, cu memorie van toelichting etc, cu lo wordo entrega na DWJZ pa e por cana su proceso y ta bay ta e ley cu ta bay cubri Inspectie Onderwijs y e di dos su tras cu lo wordo entrega cu tambe a cana e proceso caba ta e ley di beroep onderwijs.

“Nos a traha duro riba e plataforma PAL cu ta para pa enseñansa y labor, un plataforma cu ta forma di un bestuur conforma pa personanan di enseñansa, di labor y tambe sector priva pa hunto nan ta bay midi kico ta e necesidad cu sector priva mester di empleado y na ki nivel pa prepara nos enseñansa depende di e necesidad cu tin pafo den e mercado”, minister Croes a comenta.

Esaki ya caba ta den su funcionamento, manera el a sigura, unda e proximo reunion ta bay ta dia 12 di januari caminda poco a poco esey ta tumando structura fiho pa asina por duna contribucion tambe na lo cual mercado tin mester, el a duna un ehempel di esaki unda el a bisa cu diabierna siman pasa su persona hunto cu minister Glenbert Croes a sinta cu Food and Beverages Assotiation unda cu den reunion ey e punto aki a bin dilanti, e necesidad y scarsedad di empleadonan cualifica den esaki.

“Nan ta hasta willing pa yuda, pa duna nan contribucion y cu nan experticio cu hasta cierto luganan pa por practica, siña nos hobennan den un direccion y hunto nos por keda na mesa pa nos por crusa e caminda aki pa brinda lo mejor di e parti di enseñansa pa por subi mercado laboral den futuro”, el a enfatisa.

Durante 2022 tambe Openbare Avond Leergangen e cual ta conoci como OAA a inicia, unda minister Croes a sigura cu esey ta bayendo hopi bon y tin hopi interes, a cuminsa cu dos opleiding y pa februari 2023 esey lo aumenta cu dos opleiding mas.

Igualmente el a informa cu diahuebs di siman pasa el a bay Corsou pa tene diferente reunion, entre otro cu obispo Luis Secco y pastoor Cortez pa loke ta trata futuro di enseñansa na Aruba den e cual obispado tin SKOA y tin SVOA cu diferente edificionan na Aruba, asina mes nan a reuni cu minister di Enseñansa, Cultura, Ciencia y Deporte Sithree van Heydoorn pa papia tocante e weganan interinsular cu nan a firma na Boneiro na september cu lo inicia na maart y april 2023 unda a bin dilanti un bishita cu minister van Heydoorn a tene cu gobernador di San Andres, un isla cu ta banda di Colombia.

Den intercambio aki tambe a wordo treci dilanti un intercambio cu San Andres, Corsou y Aruba kier un tipo di serie di baseball unda Aruba a pone su atencion tambe pa desaroya e proyecto aki.

Tambe el a reuni cu minister Desaroyo Economico Ruisandro Cijntje unda nan a papia riba economia y deporte pa por stimula un poco mas e hermandad entre e dos pais, den un otro reunion el a informa cu hunto cu e canal di television Nos Pais a lansa un proyecto di baseball profesional cu ta yama “Serie di Caribe”, a anuncia cu Corsou lo participa na februari den e Serie di Caribe cu lo tuma luga na Caracas, Venezuela, den esaki minister Croes a anuncia cu entre 4 pa 6 hungado di Aruba lo forma parti di ekipo di Corsou.