Minister di Finanzas y Asunto Economico, Geoffrey Wever (Futuro) a reuni cu presidente Sra. Lidewijde Ongering y secretario Sr. Han van Midden di Colegio di Supervision Financiero Aruba (CAft) riba temanan di sumo importancia pa finanzas publico di Aruba.
Durante e reunion a elabora riba e trayecto pa e prome presupuesto complementario 2025 cu lo ser trata pa Parlamento. Tambe a elabora riba preparacion di e presupuesto 2026 cu pronto lo keda entrega na Raad van Advies y despues na Parlamento di Aruba. Riba ambos CAft a duna su conseho y recomendacionnan. Ambos presupuesto ta cumpli cu e norma presupuestario manera ley ta prescribi.
Como parti di e ciclo presupuestario, minister Geoffrey Wever a elabora riba entrega di e jaarrekening di Pais Aruba pa asina minimalisa e retraso di entrega den esaki. Tambe a intercambia opinionnan riba e uso di schatkistpapieren y implementacion di e rijkswet riba supervision financiero. Durante e reunion aki tambe a trata e preocupacion di CAft riba e riesgonan di AWSS NV cu a wordo lanta den 2024, segun un comunicado di gobierno.
Dialogo continuo cu CAft ta forma un parti integral di e maneho financiero di Aruba. Conseho y recomendacionnan di CAft riba finanzas publico ta den ehecucion y den liña cu e maneho financiero di Aruba segun minister Geoffrey Wever.
