Gobierno di Aruba, pa medio di Minister di Finansazas, Xiomara Maduro ta trahando riba Presupuesto 2024. E siman aki e mandatario hunto cu expertonan di Departamento di Finanzas a repasa e ‘Meibrief,’ cu ta e carta di Minister di Finanzas dirigi na Conseho di Minister, cu ta contene e cuadro financiero cu despues lo bira Presupuesto 2024 di nos Pais.
E mandatario a splica cu tin decisionnan cu tin cu tuma den Conseho di Minister pa asina Presupuesto 2024 por conta tambe cu un surplus di 1% di nos GDP. Minister di Finanzas ta trahando pa e aña aki atrobe por cumpli debidamente cu nos Constitucion pa entrega Presupuesto 2024 na tempo, prome cu 1 di september 2023 na Parlamento di Aruba.
Minister Maduro lo tene Pueblo informa riba e trabaonan pa Presupuesto 2024 por wordo finalisa, segun un comunicado di gobierno.
