Tin un un carta di Minister di Finanzas dirigi na tur departamento di Gobierno ta circula rond den publico. “Pa evita mal comprondemento, ta bon pa brinda e siguiente informacion.”

Minister di Finanzas y Cultura, Xiomara Maduro ta trece dilanti den un comunicado di prensa, cu tur aña mita di october, Minister di Finanzas ta manda un carta pa avisa e departamentonan cu ta bay cera e administracion pa e aña coriente y pa esaki ta duna un fecha te cual por haci obligacion financiero nobo pa Pais Aruba.

Banda di esaki sa pidi e departamentonan tambe pa indica cual ta e inversionnan cu ainda lo wordo haci den e aña corespondiente pa asina e suma aki keda reserva. Esaki ta un practica normal den tur gobernacion y ta wordo haci pa evita cu ta surpasa e sumanan acorda pa Parlamento di Aruba den Presupuesto di Pais Aruba.

Minister Maduro ta acentua cu desde aña 2018 Gobierno a keda den e margen di gastonan presupuesta y aproba pa Parlamento di Aruba y no mester a bay fin di aña pa pidi mas placa na Parlamento. Minister di Finanzas, Xiomara Maduro su maneho desde un principio ta uno sostenibel, efectivo y transparente na publico en general, segun e comunicado. Cu e informacion aki e mandatario encarga cu finanzas publico ta sigui duna contenido na su maneho financiero y ta spera di a aclaria e situacion y evita cualkier mal comprendemento.

Nota di redaccion

Manera ministro encarga cu finanzas ta splica den e nota di prensa aki, no ta pa promer biaha cu gobierno ta clausura administracion financiero promer cu fin di aña. Sin embargo, den e circulaire cu a bay pa e departamentonan y demas entidadnan estatal ta e ministro mes a menciona e situacion financiero precario di Pais Aruba, y a menciona den esaki e situacion di e pandemia y e “intencion” di Hulanda pa no duna apoyo di liquidez pa e ultimo kwartaal di 2021.

E ultimo observacion aki ta parce un poco straño ya cu den e proximo reunion di Conseho di Ministro di Reino, fin di october, lo a tuma e decision final si Aruba ta cumpliendo y si toch ainda ta haya e ayudo referi. Nos mester conclui anto cu ya ta un hecho cu Aruba no ta bay cumpli? Den nos publicacion di ayera, 7 di october, nos no a publica nada mas cu e contenido di e circulaire di e mandatario.

LEAVE A REPLY

Please enter your comment!
Please enter your name here