Diabierna atardi, Minister di Husticia, mr. drs. Arthur Dowers, a ricibi Comandante di Koninklijke Marechaussee, Luitenant-Generaal Annelore Roelofs na su oficina. E bishita aki ta demostra e relacion profundo y structural entre Aruba y Hulanda y e deseo fuerte pa fortifica e cooperacion den e cadena hudicial den Reino.
Minister Dowers, durante su bishita algun tempo atras na Hulanda, ya e reuni cu Comandante Roelofs den cual a trata topiconan crucial relaciona cu seguridad di frontera, incluyendo traficacion di hende y migracion.
Algun siman pasa, Minister Dowers a haci un bishita na e base di Marina Real na Savaneta na unda cu a reuni tambe cu e personal di RST y Koninklijke Marechaussee y comparti su pensamento pa cu e rol di dicho instancianan.
Minister Dowers a enfatisa cu e rol di Koninklijke Marechaussee na Aruba y den Reino ta fundamental den proteccion di nos frontera y cu su ministerio ta compromete pa fortifica tur nivel di colaboracion, cu respet mutuo y un meta comun: protege bienestar y seguridad di pueblo Arubano.
