Dialuna mainta Minister di Husticia y Energia, mr. drs. Arthur Dowers (AVP) a haci un bishita oficial na WEB Aruba N.V. pa presencia un paso importante den desaroyo di e sector di energia di Aruba: e traspaso di e fundeshi principal y radiatornan na Wärtsilä Finland Oy pa e expansion di e planta di energia RECIP-3.
Durante e bishita, minister Dowers tabata testigo di e firmamento di e certificado di traspaso entre WEB y Wärtsilä, marcando e prome logro den e proyecto strategico aki.
Na augustus 2026, WEB Aruba lo agrega 36 MW di capacidad firme, aumentando e capacidad total na ±250 MW. E expansion aki ta fundamental pa fortifica e capacidad di produccion di WEB, no solamente pa limita y mitiga interupcion di coriente, pero tambe pa duna sosten na e transicion nacional pa integracion di energia renobabel.
Cu mas capacidad firme y confiabel, lo por integra energia di biento, solo y bateria di manera mas efectivo riba e red. Ora e expansion ta cla, e lo reemplasa e planta mobil cu a drenta den operacion na augustus 2024 pa cumpli cu e demanda creciente.
E expansion di RECIP-3 ta tuma luga den diferente fase, y e finalisacion y traspaso di e fundeshi principal y radiatornan ta un paso importante cu a keda completa den un tempo record. Manera WEB Aruba a comunica durante varios ocasion, Aruba ta experimentando un aumento substancial den demanda di energia, ocasiona pa temperaturanan mas halto y turismo creciente. Desde mita di 2023, esaki a pone presion grandi riba e plantanan di generacion. E proyecto RECIP-3 ta parti di e plan strategico pa garantisa cu WEB por sigui cumpli cu e demanda creciente. Combina cu proyectonan di energia renobabel y almacenahe cu ta na caminda, ta spera cu e capacidad lo ta suficiente te cu 2031.
Durante e ceremonia, CEO di WEB, Alfredo Koolman, a enfatisa cu tin un espirito colectivo fuerte entre tur partido interesa pa realisa e meta ambicioso di 50% energia renobabel. Cu mas claridad recientemente riba proyectonan di biento, solo y almacenahe, e meta ta bira dia pa dia mas realistico. Koolman tambe a comparti cu e apoyo substancial cu Ministerio di Asuntonan Economico y Clima Hulandes a priminti pa 2025 y e añanan cu ta bini, lo yuda hopi den realisa esaki.
