Minister di Salubridad, Turismo y Deporte, Dangui Oduber: ‘Prome siman di juni Aruba ta bay ricibi prome barco crucero’

Durante un conferencia di prensa di gobierno ayera, minister Dangui Oduber a anuncia reapertura di frontera maritimo, cu lo ricibi e prome barco crucero na luna di juni.

Aña pasa tabata premira cu Aruba lo ricibi alrededor di un miyon turista di crucero. Sinembargo, pa motibo di pandemia esaki no por a tuma luga, y desde maart 2020 Aruba no a ricibi barco crucero.

Oduber a indica cu maske nos a mira algun barco crucero na nos isla, esakinan tabatin solamente tripulacion abordo, y no turista.

“Pero despues di varios luna di combersacionnan cu e lineanan crucero tocante protocolnan, kico ta e protocolnan di mas safe, di mas sigur, kico ta e fechanan cu nan mes ta premira cu nan por cuminsa nabega back, kico ta e fechanan cu Aruba mes ta premira como pais cu nos lo ta cla pa ricibi barconan crucero back, mi ta kere a yega e momento cu awe nos por anuncia cu e prome siman di juni Aruba ta bay ricibi e prome crucero”, Oduber a comenta.

Oduber a indica cu e prome crucero cu ta bay yega back Aruba ta trata di Celebrity Cruise Line, un linea di Royal Caribbean Cruise Line, cu segun Oduber ta esun di mas exlusivo. “Nan a caba di haci un inversion di $500 miyon den upgrading di nan barconan crucero. Ta un barco hopi upscale cu sigur lo trece turista afluente.”

Ademas, Oduber a indica cu e crucero aki no ta bay stop solamente na Aruba, sino tambe lo inclui Corsou, St. Maarten y Barbados.

Protocolnan

Tur tripulacion abordo mester ta vacuna 100%. “Esaki ta conta pa pasaheronan tambe”, Oduber a indica, nificando cu tur persona abordo di e crucero, pasahero (turista) y tripulacion, tur mester a haya nan vacuna contra coronavirus prome cu ta permiti nan aborda e barco.

Banda di esaki, ta exigi e PCR test pa tur pasahero 72 ora prome cu aborda. Y tambe nan ta bay bende solamente 50% di nan capacidad. “Cu esaki nos por premira cu e capacidad cu e islanan aki ta bay ricibi ta core entre 1,500 cu 2,000 pasahero crucero, y nan lo cuminsa e prome siman di juni 2021.”

Ademas Oduber a indica cu tin otro lineanan di crucero cu a expresa interes di bolbe den lunanan di zomer, esta juni, juli y augustus. Esakinan ainda ta den combersacion. “Nos ta premira cu pa e tempo ey e situacion lo ta un tiki diferente, mirando con mundo ta vacunando,” Oduber a bisa. Por ehemplo, el a menciona cu te awo, tin mas di 450 miyon dosis di vacuna a wordo administra rond mundo. Y presidente Mericano, Joe Biden, a indica cu nan ta spera cu pa dia di independencia Mericano (4 di juli) lo por habri Merca completo back. “Esaki sigur ta crea perspectiva positivo pa Aruba.” Y teniendo tur esaki na cuenta, Oduber a bisa cu nan ta premira cu Aruba tambe por cuminsa ricibi pasahero di crucero na luna di juni.

Oduber a expresa cu Aruba tambe ta ‘aumentando nos capacidad di e manera con nos ta vacunando’, y ta ricibiendo mas vacuna di Hulanda, ‘loke ta contribui na un perspectiva mas positivo aki algun luna’. Oduber a indica cu pa luna di juni y juli Aruba mester ta cla pa ricibi turistanan crucero.