Diaranson mainta minister di Salud, Mervin Wyatt-Ras, a realisa un bishita na Departamento di Salud (DVG). E meta di e bishita tabata pa como minister di salud e haya un bista di con DVG ta traha.
Den su declaracion na Bon Dia Aruba el a splica cu DVG ta un departamento hopi importante pa Aruba, den tanto pa loke ta trata cuido curativo como tambe preventivo.
Durante su bishita no solamente el a haya un recorido di e departamento, pero el a indica cu el a haya tambe un presentacion di tur kico ta e vision, mision, e forma di traha y tur e retonan cu tin, pero tambe locual tin pa futuro pa DVG.
El a remarca cu ta importante pa e diferente stakeholders traha hunto cu departamento di Salud y alabes a enfatisa e importancia di e parti preventivo.
“Mi ta haya hopi importante cu nos ta stimula e parti preventivo pasobra ya caba nos ta atende cu e parti curativo, e cuido, cu hende ta cumpli cune y cu ta zorg pa nan. Pero tambe nos tin cu wak e futuro unda nos por bay conhuntamente cu tur e otro entidadnan pa asina nos por logra cu nos ciudadanonan ta biba un bida mas saludabel pa preveni tur e problemanan cu tin di malesanan cronico,” el a subraya.
Minister Wyatt-Ras a menciona cu tin diferente rapport, manera STEPS, cu ta bisa cu tin un grado di sobrepeso y obesidad halto na Aruba, 78%, un grado halto di diabetes, y presion halto tambe ta un problema hopi grandi den comunidad.
E mandatario a enfatisa cu tur e esfuersonan hunto por logra brinda ayudo na e futuro generacion pa nan por ta mas consciente y cuida nan salud mas.
“Mi a scucha di tur e proyectonan cu tin pa promove estilo di bida saludabel. Seguramente como minister hunto cu departamento di Salud por hiba un maneho pa garantisa pueblo cu nos tin un miho calidad di salud,” el a finalisa.
