Den un comunicado di prensa, minister di Salud Publico, Mervin Wyatt-Ras (AVP) a reacciona tocante un carta abierto cu ciudadano Jayburtt Dijkhoff, presidente di Fundacion SIKI, a publica den medionan di comunicacion ayera. Den su declaracion, e minister no a atende ningun di e preocupacionnan expresa pa Dijkhoff mes, sino a duna un version alternativo di kico ta e disputa entre e ciudadano y e minister.
E minister a cuminsa bisando cu Sr. Dijkhoff a “trece padilanti diferente insinuacionnan pa loke ta trata funcionamento di diferente entidadnan y departamentonan” den e carta abierto, algo cu e minister no a aprecia.
Wyatt-Ras a continua bisando cu e mester aclaria loke a tuma lugar prome cu e carta, cu por a conduci na e malcontento di Sr. Dijkhoff cu e minister. E minister a bisa cu a nenga acceso na Sr. Dijkhoff pa drenta su oficina, “pa motibo cu tabatin acusacionnan pa loke ta trata algo cu el a trece padilanti ariba Facebook.”
E minister den e video comparti a mustra un print-out di loke ta parce di ta un post di Facebook comparti pa Sr. Dijkhoff, den cual, segun e minister, e lo ta “propagandando cu e ta traha pa comunidad” y cu “si ta desea pa consulta cune,” cu Sr. Dijkhoff ta ofrece pa “intermedia” y pa defende “e persona su derecho.” Minister Wyatt-Ras a menciona e tarifanan cu Sr. Dijkhoff lo a ofrece pa su servicionan den e post menciona.
“Mi tin cu bisa como persona na cabes di Instituto di Calidad, cu ta un instituto hopi prestigioso cu a wordo lanta a base di ley y cu mester salvaguardia e calidad di cuido na Aruba, no por ser permiti cu e ta haci un anuncio asina ey,” minister Wyatt-Ras a indica.
Minister di Salubridad Publico a continua contando cu prome cu a ofrece su servicionan riba Facebook, Sr. Dijkhoff a entrega un peticion na Ministerio di Salud pa por haci ‘neven arbeid’, kiermen trabao banda di su trabao cu e ministerio, pa por haci e tipo di trabao cu el a ofrece riba Facebook. Sinembargo, minister Wyatt-Ras no a duna un contesta mesora, pasobra el a manda e carta cu e solicitud di Sr. Dijkhoff na Bureau di Integridad. “Pakico? Pasobra mi no a sinti mi bon pa un persona cu ta na cabes y cu mester garantisa e calidad di cuido tambe por duna e servicio eynan,” Wyatt-Ras a indica, agregando cu e ta considera esaki como un conflicto di interes.
Sinembargo, segun e minister, a pesar cu e no a ricibi un contesta di e minister ainda, Sr. Dijkhoff a cuminsa “anuncia of propaganda su servicionan” riba e plataforma social, siendo cu e no tabatin autorisacion pa haci e trabao aki. “Dus e no ta cuadra,” segun e minister, pasobra den Instituto di Calidad, Sr. Dijkhoff tin un funcion ehemplar. “Dus a base di esey mi a haya e conseho e ora” pa prohibi acceso di Dijkhoff na su oficina, “y esey a wordo haci manera debe ser.” A traves di Departamento di Recurso Humano (DRH) a notifica Sr. Dijkhoff di e decision di e minister.
Ademas, Wyatt-Ras a indica cu a pesar cu el a tuma nota di e carta abierto di Sr. Dijkhoff, “e no ta un carta oficial ainda.” Segun loke e minister a splica den su video, den e carta Dijkhoff “a tuma su retiro tambe, dus notificando cu e no lo traha mas entrante e fecha, y cu e ta laga e trabao despues di un par di luna.”
Segun Wyatt-Ras, awo ta bay tin un proceso den cual ta bay cuminsa un investigacion riba loke por a sucede. “Y mi no sa kico a pone cu Sr. Jayburtt Dijkhoff e ora a bin dilanti asina y a cuminsa manda acusacion riba diferente entidadnan y nos tur, bo por bisa, cu ta encarga cu salubridad. Y asina indica tambe cu tin cartel, acusando,” Wyatt-Ras a bisa.
El a cuestiona e hecho cu Dijkhoff a describi e fayonan structural di diferente gobierno den sector salud, pero cu Dijkhoff no lo a bati alarma pa esakinan prome. “Mi ta haya si, mi ta sorprendi dicon e tempo ey cu e tabata eynan e no por a haci algo cune, no? Dus den e sentido eynan, trece padilanti na nos Bureau pa asina nos por atende cu e asuntonan aki.”
Segun Wyatt-Ras, “mi no ta kere cu e zorg, e cuido ta ser yuda, of cu bo ta djis haci un acusacion, pasobra semper bo mester bin cu e solucionnan tambe pa cu esaki.”
Un acusacion di Dijkhoff cu minister Wyatt-Ras a atende directamente tabata e falta di transparencia y comunicacion. “Naturalmente, nos directie, nos departamentonan ta habri si pa comunicacion cu Sr. Jayburtt Dijkhoff,” el a bisa. “No ta asina cu bo ta intransparente. Ami no a experimenta esey den e tempo cu mi a traha cune, y semper ami anto como minister, e 5 luna cu nos ta den gobernacion, mi ta un minister cu ta reuni hopi cu e departamentonan, y pa mi sa kico ta pasa, kico ta come y bebe den e departamentonan. Dus e ta un tiki straño cu mi ta haya e remarca eynan.”
El a enfatisa cu a pesar di e disputa y malcontento, “semper mi ta keda habri pa comunicacion.” Wyatt-Ras a agrega cu “solamente e biaha aki mi kier a aclaria kico ta pasando. Y no ta asina cu bo ta bisa un hende por djis bin tilda bo di algo, pero mi ta akinan tambe pa salvaguardia cu e calidad di cuido ta ser treci padilanti, nos por traha mas eficiente cu otro y cu nos como gobierno.” Pero el a responsabilisa Sr. Dijkhoff, bisando cu “ora bo tin un kwaliteitsinstituut, bo ta na cabes di un kwaliteitsinstituut, bo mester duna ehempel, bo mester ta esun cu ta mustra con cos mester bay.”
Finalisando, minister Wyatt-Ras a bisa cu ta un conflicto di interes “ora tin algo cu bo mester garantisa y cu bo mes ta bay duna e servicio eynan anto pidiendo placa tambe p’e. Mi ta kere cu esey ta locual cu mi ta trece padilanti y naturalmente mi ta keda habri pa e comunicacion pasobra esey semper tabat’ey y e transparencia semper tabat’ey tambe y tambe t’ey.”
Preguntanan di Dijkhoff
Manera menciona, den su comunicado e minister no a contesta directamente ningun di e preguntanan cu Sr. Dijkhoff a haci den su carta habri. Den un articulo anterior di Bon Dia Aruba, disponible riba nos website, nos a detaya e cinco punto di atencion cu Sr. Dijkhoff a skirbi den su carta, cual tabata:
1. Conflicto di interes AZV-HOH-IVA;
2. E proceso di tuma keho door di IVA;
3. Calidad di cuido via maneho di AZV;
4. Directie Volksgezondheid (DVG) y prevencion;
5. Adulto mayor y persona cu limitacion.
Pa cada punto, Dijkhoff a haci tres of cuatro pregunta, cual a pidi pa minister Wyatt-Ras duna un contesta publico y por escrito.
Te ciere di e edicion aki, Dijkhoff no a reacciona riba e comentarionan di e minister.
