Dialuna mainta, Minister di Husticia, Integracion, Transporte Publico y Energia, mr. drs. Arthur Dowers (AVP), a bishita e dump di Parkietenbos despues cu siman pasa varios habitante di e area a expresa nan preocupacion pa e holor fuerte den e zona.
Manera Bon Dia Aruba a reporta e siman aki, comunidadnan incluyendo Cas Paloma, Simeon Antonio y otro areanan cercano a reporta cu e holor – hopi biaha describi como similar na desperdicio humano – a bira cada biaha mas intenso den simannan recien. Residentenan ta bisa cu e holor no ta solamente persistente sino tin biaha hasta abrumador, afectando rutina diario y lantando cada bes mas preocupacion tocante posible implicacion pa salud.
E residentenan ta resalta cu e situacion no ta uno nobo. Keho tocante mal holor vincula na actividadnan na Parkietenbos ta keda ripiti durante añanan. Sinembargo, hopi ta bisa cu e episodio mas recien ta sinti particularmente severo, cu algun indicando cu e holor ta keda durante dia y hasta ta drenta cas di hende, forsando famianan pa biba cu bentana cera y limita actividadnan pafo.
Segun un comunicado di gobierno, hunto cu representantenan di Utilities y AWSS, Minister Dowers a evalua e proceso actual di maneho di sludge y tratamento di awa sushi, incluyendo e facilidadnan na e dump. E bishita tabata enfoca riba compronde miho e situacion y identifica unda mehoracion urgente ta necesario.
Durante e recorido, Minister Dowers a tende preocupacion di algun habitante di e area, kende pa añanan largo a confronta e problema aki. Minister Dowers a tuma nan preocupacion na serio como parti di e proceso pa yega na un solucion structural y permanente y ta bay traha un plan duradero hunto cu stakeholders.
Gobierno ta comprometi pa traha hunto cu e instancianan relevante pa implementa un solucion duradero cu lo elimina e molester di holo y trece trankilidad y dignidad bek den e area di Parkietenbos, e comunicado ta enfatisa.
