Den un entrevista cu Bon Dia Aruba, Minister di Husticia, Integracion y Transporte Publico, Arthur Dowers a reacciona, y a clarifica critica cu actual parlamentario y ex prome minister Evelyn Wever-Croes a publica recientemente relaciona cu e topico di Utilities Aruba NV, mas specificamente tocante interes extra cu gobierno lo mester paga pa motibo di cambionan realisa den e Hunta di Comisario di Utilities Aruba NV.

Parlamentario y lider di fraccion MEP, Evelyn Wever-Croes a publica recientemente riba su pagina di Facebook cu ministernan Arthur Dowers y Rene Herde ta causa un gasto adicional di mas di cinco miyon florin na extra interes na Utilities Aruba N.V., WEB Aruba N.V. y N.V. ELMAR.

Den su publicacion e ex mandatario ta remarca cu “fraccion di MEP ya tene Arhtur Dowers y Baba Herde personalmente responsabel pa e interes adicional” cu e companianan di utilidad lo mester paga como resultado di cambionan implementa den e Hunta di Comisario di e companianan aki.

Reaccionando riba e publicacion aki minister Dowers a splica cu tin diferente condicion stipula den e reglanan pa loke ta financiamento di e organisacionnan aki. Ademas el a remarca cu parlamentario Evelyn Wever-Croes ta hopi bon informa di loke ta sucede den e compania aki pasobra “ta hendenan cu ta hopi liga na dje mes ta esunnan cu ta bay purba mira si nan por saca placa extra for di organisacionnan cu tin un meta pa duna servicio na publico.”

E mandatario a indica cu ta spera cu e situacion no mester yega asina leu pasobra en berdad ta Gabinete Wever-Croes mes a stipula e condicionnan ora di financia y aworaki tin diferente investigacion ta tumando luga den e companianan di utilidad pa mira si loke e gobierno anterior a haci tabata cu un interes general y no un interes pa un grupo specifico.

“Mi ta tende el a bisa cu e kier tene ami responsabel, pero mester mira si loke nan a haci ultimo añanan door di nombra nan famia, amigonan, mitar di partijraad di MEP den e organisacionnan aki, si nan a traha na interes di e comunidad, si nan a haci tur loke ta posibel pa percura e miho condicionnan a ser garantisa pa e financiamento cu nos ta haya y si e interes di e pueblo y di e organisacion aki tabata para central of si e interes di cierto grupo tabata para central pa nan por gana mas tanto placa posibel,” Minister Dowers a subraya.

El a enfatisa cu na e momentonan aki e no ta bay duna un splicacion mucho amplio, pero segun cu investigacion tuma luga pueblo lo ser informa di e resultadonan di esaki.

E mandatario a agrega cu e ta haya ta lamentabel ora e mira loke e parlamentario Wever-Croes, anteriormente prome minister, a haci y a permiti cu a ser haci den e companianan di utilidad.

El a splica cu tin diferente estudio cu a ser realisa y di e estudionan aki por mira cu, por ehempel den e compania estatal N.V. ELMAR, na momento cu tabatin un director cu a realisa su investigacion a constata cu tabatin cierto actonan cu no tabata corecto den e organisacion.

E mandatario a sigui splica cu na luga di atende cu e hendenan cu ta comete actonan incorecto, e gobierno anterior a core cu e director y nombra amigo y famianan cerca y sostenedornan pa nan por a sigui haci loke nan a haci.

Minister Dowers a remarca cu loke a pasa den e companianan estatal aki ta “cosnan masha mahos” y segun tempo pasa cu Gabinete AVP-FUTURO detaya tur e cosnan cu a sucede a traves di investigacion, pa mustra pueblo e resultado di esakinan. El a agrega cu e gobierno anterior ta pretende cu aworaki bou di e capa di good corporate governance cu e gobierno actual mester laga e hendenan cu t’ey den e Hunta di Comisario “keda pa semper den e luga nan ey pasobra no mag di mishi cu nan pa politica.”

“Si bo ta un hende cu tin un tiki consenshi bo ta bin bisami cu ami ta nombra mi hende politico un caminda anto sin cu e ta cumpli cu niun di e rekisitonan y ora cu nos bisa cu nos kier mira hende profesional den e organisacion cu si ta cumpli cu e rekisitonan di good corporate governance ta bin usa e reglanan di good corporate governance pa defende e maldad cu a ser haci. Mi ta hopi decepciona den e señora aki. E ta un hende cu tin conocemento. E señora aki ta un hende cu a bay scol, cu a siña cierto cosnan y mi ta bisa si bo tin consenshi bo no ta haci e cosnan aki. Pero pueblo lo tin cu husga na dado momento cu e informacionnan aki sali mas amplio,” el a finalisa.

Relaciona cu e topico aki recientemente parlamentario Xiomara Maduro (MEP), a manda pregunta na minister di Finanzas, Geoffrey Wever (Futuro) tocante posible mal maneho den e companianan di utilidad: WEB, ELMAR y Utilities NV.

Segun e parlamentario a bisa den un comunicado di prensa, e 11 pregunta haci ta trata e cambio di comisarionan cu ta tumando lugar na e companianan di utilidad, sin cu ta cumpli cu e reglanan di “good corporate governance.”

Maduro a expresa preocupacion pasobra ta haci nombramento sin aprobacion previo di lenders, kendenan ta institutonan financiero cu ta presta e companianan di utilidad placa, y cu segun contract, mester aproba tur comisario prome cu nan por cuminsa asumi nan funcion.

Den su carta, parlamentario Maduro a expresa preocupacion cu e situacion por tin consecuencia financiero serio, incluyendo un posible “default tecnico” cu por pone den riesgo e capacidad di e companianan di utilidad pa sigui inverti den infrastructura vital, manera energia sostenible y expansion di e red di coriente.

Un di e preguntanan ta cuestiona e rol di Minister di Finanzas den e proceso di nombramento di comisario, y ta cuestiona e motibo cu e mandatario ta scoge pa tuma vakantie net den un periodo cu tanto riesgo financiero ta loer na e companianan di utilidad.