Arthur Dowers

E inkietud den comunidad riba e cantidad di Venezolano yegando Aruba y nan comportacion, ta sigui crece. Video manera di ‘Venezolan hortando den supermercado’ y un experiencia di un señora haci compras na Pricesmart ta causa hopi comentario e ultimo dianan den social media.

E declaracion di polis cu e atracadonan riba casino Excelsior dialuna tabata papiando Spaño atrobe tabata fuel e discusion aki. Mester bisa cu no tin prueba te awor cu ta trata di Venezolanonan. Si por ripara cu tin mas y mas storia di particularmente hende muhe cu no ta sinti nan mes sigur ora haci compras of cana riba caya pa motibo cu Venezolano ta acerca nan pa asina por haya dollar.

No tin cifra confiabel
Sinembargo, minister di Husticia Arthur Dowers ta bisa Bon Dia Aruba, cu te awor not tin indicacion cu tin mas Venezolano envolvi den actividadnan criminal na Aruba. Pero e no tin cifra tampoco. “Manera bo sa lo tuma tempo prome cu nos tin estadistica confiabel di criminalidad.” Aki un par di luna  e minister ta bisa cu por analisa si berdad tin mas Venezolano envolvi den criminalidad.

Ora di puntra si e mandatario no a haya siñal di su cuerpo policial, e ta bisa cu berdad e ta reuni regularmente cu e mando policial. Pero a base di esaki sr. Dowers tampoco por bisa cu tin mas Venezolano ‘sospecha, deteni sea cera den prison’.

E minister ta comparti e inkietud den nos comunidad. “Mi ta realisa cu tin hopi Venezolano yegando Aruba. Y nan ta comporta den un forma cu no ta considera como normal. Esaki ta hala atencion y hende ta preocupa. Nos ta tene cuenta cu esaki y nos tin nos wowo riba dje.”

 

LEAVE A REPLY

Please enter your comment!
Please enter your name here