Minister di Enseñansa y Deporte Sr. Endy Croes a splica cu aña 2022 tabata un aña cu yen di reto y hopi trabao den enseñansa. Ministerio di Enseñansa a traha riba diferente proyecto pa asina por duna su contribucion pa mehora e calidad di enseñansa na Aruba.

E vision di Minister y maneho ta papia pa su mes, esta Enseñansa den Transicion. Esaki ta basa riba Sustainable Development Goals # 4 den e agenda 2030 di Nacion, Doorlichting Rapport di Inspectie di Hulanda y Aruba den cuadro di acuerdo Landspakket y acuerdo entre gobiernonan y PEN 2023. Enseñansa ta dirigi riba necesidadnan individual y ta tene na cuenta e contexto multilingual di Aruba. Enseñansa mester ta accesibel pa tur hende den comunidad y mester brinda oportunidad continuo na nos hobennan. Lifelong Learning y habilidadnan di competencia di siglo 21 lo haya su atencion debido. E sistema educativo mester ta suficiente flexibel pa por adapta rapidamente na e desaroyonan den sociedad. Enseñansa ta e vehiculo mas poderoso pa un desaroyo sostenibel di un pais.

Proyecto pa Modernisa Leynan di Enseñansa:

Den e luna di maart di aña 2022 a inicia e proyecto Modernisacion di Leynan di Enseñansa, cual proyecto ta dirigi riba renobacion di tur ley di enseñansa y traha leynan nobo cu tin mester. Leynan manera LV Kleuter, LV Basis y LV Voortgezet Onderwijs, LV Hoger Onderwijs ta entre otro leynan cu lo wordo modernisa. Pa Beroeps onderwijs, Inspectie Onderwijs y Special onderwijs lo bay haya nan propio landsverordening.

Proyecto di DATA:

Otro proyecto importante cu a realisa ta e Proyecto di Data. Den e luna di april di aña 2022 a inicia cu e proyecto aki, pa conecta tur 85 scol na Aruba riba un solo sistema, esta ‘Open Emis’ di Departamento di Enseñansa.

Financiamento di Enseñansa:

Den e luna di april di aña 2022 a contrata un register accountant pa organisa un sistema eficiente y transparente den e sistema di financiamento di enseñansa. Esaki ta recomendacion number 10 di e Doorlichting Rapport. Trabao aki ta casi cla y lo mester pasa ministerraad pa un decision final pa pronto bay den ehecucion.

Maneho di Idioma:

Pa loke ta trata Proyecto Maneho di Idioma, di acuerdo e Tussenrapportage Doorlichting a institui un comision den e luna di maart di aña 2022. E meta di e proyecto aki ta pa scoge un maneho di idioma cu ta consecuente. E comision a haci un trabao hopi largo scuchando masha hopi “stakeholders” pa asina bin cu un rapport final. Basa riba e rapport aki Minister Endy Croes lo tuma un decision di e direccion cu nos lo mester scoge pa por logra un miho calidad y miho resultado den enseñansa.

Proyecto PEL (Plataforma di Enseñansa y Labor):

Minister di Enseñansa a traha hunto cu Minister di Labor Sr. Glenbert Croes riba un proyecto nobo, Plataforma Enseñansa y Labor (PEL). E meta principal di e proyecto aki ta pa educa e studiantenan na e necesidad di mercado. Un tremendo proyecto, unda cu enseñansa, labor y sector priva a bin hunto pa investiga ki tipo di enseñansa nos mester y na ki nivel pa asina prepara nos hobennan y futuro empleadonan na necesidad cu mercado ta exigi. E Stuurgroep ta consisti di expertonan di Enseñansa, Labor y Sector Priva.

Reina Beatrix School y Scol Paso pa Futuro a intercambia edificio:

Den e luna di juli di aña 2022, a aloca Reina Beatrix School na e edificio di Scol Paso pa Futuro, pa asina e alumnonan por tin un miho ambiente di siña y ta bao un solo dak cu mas di 300 alumno. Actualmente Reina Beatrix School ta den un solo edificio y tin 17 klas. Anteriormente Reina Beatrix School tabata aloca den 3 diferente edificio, cual no ta apropia pa e docente y alumnonan. E Mandatario di Enseñansa a aloca Scol Paso pa Futuro den un edificio na Seroe Blanco, unda nan tambe ta “fit” na un solo edificio cu alrededor di 100 studiante.

Instructornan di Landamento:

Fin di augustus di aña 2022, Minister Endy Croes a logra firma cu e instructornan di landamento un contracto di 5 aña y di e forma aki duna nan un stabilidad. Pa prome biaha den 30 aña di existencia di e proyecto aki cu tur instructornan di landamento a firma un contracto 5 aña. Tambe, Minister Endy Croes a inclui Scol Basico Dornosal den e proyecto di landamento escolar, mirando cu nunca e scol aki a forma parti di e proyecto di landamento.

A firma contracto cu compania pa drecha sistema electrico di Souer Juliette School:

E Mandatario di Enseñansa a caba di cera un contracto cu un compania pa revisa y repara e coriente di Emma School, mirando cu e scol tin problema hopi grandi cu e sistema di coriente. Prome siman di januari 2023 e trabaonan aki lo inicia y manera esaki wordo aregla, e di dos fase lo ranca su tras, esta pa instala unidad di airco pa dicho scol.

A inverti 600 mil pa renoba y habri OAA back den un bachi moderno:

Minister Endy Croes a aloca AWG. 600 mil a traves di DPS pa e renobacion di Openbare Avondleergang Aruba (OAA). Un sistema cu opleiding nan moderno. OAA ta educacion pa alumnonan di 17 aña bay ariba. A amplia e scol mas, pa asina brinda oportunidad na esnan cu no a termina scol pa termina nan estudio segun nan competencia.

Finalmente por mira atras riba un aña 2022 cu hopi actividadnan positivo den enseñansa y cu a realisa varios trabaonan di vital importancia pa enseñansa di Aruba. Nos no ta ainda unda nos ta desea di ta, pero den aña 2023 lo sigui inverti tempo y energia pa asina hunto cu rapport riba mesa y conseho di tur nos profesionalnan den e tereno aki nos tuma e miho decisionnan na beneficio di nos enseñansa. Aña 2023 ta e aña di Union y Positivismo y hunto nos lo logra.