Minister di Finanzas, Asuntonan Economico y Sector Primario, Geoffrey Wever, a anuncia ayera mainta durante un conferencia di prensa e nombramento di Sr. Thomas Domhoff como e presidente nobo di Banco Central di Aruba (CBA). E proceso di seleccion tabata largo y cuidadoso y a ser lidera pa e Raad van Commissarissen (Conseho di Superivison) di CBA.
E Conseho, bao di guia di Sr. Arie Swaen, como un organo independiente cu ta supervisa e direccion strategico di e banco, tabata responsabel pa tur fase di e proceso, incluyendo e definicion di e perfil, reclutamento, evaluacion y screening di candidatonan, cu apoyo di un experto externo.
Riba base di nan evaluacion profesional y criterio independiente, e Conseho a determina cu Domhoff tabata e candidato mas adecua pa lidera e institucion den su siguiente fase di desaroyo. Siguiendo e recomendacion aki, minister Wever a nombra Domhoff oficialmente pa un periodo di cinco aña.
Despues di casi 20 aña liderando Banco Central di Aruba, Sra. Jane Semeleer a retira na december 2025, lagando un legado di gran importancia. No solamente e tabata e prome muher cu a ocupa e puesto aki, pero tambe a demostra liderazgo firme durante periodonan dificil den economia mundial y a hunga un rol clave den mantene e stabilidad di e florin Arubiano.
Domhoff tin mas di 30 aña di experiencia den liderazgo den sector di banco, finanzas, agricultura y educacion, tanto na Aruba como internacionalmente. Recientemente, el a ocupa e posicion di CEO di GI-RO Settlement Holding N.V. na Corsou. Su amplio experiencia, enfoke strategico y atencion pa innovacion y desaroyo di capital humano ta considera esencial pa fortalece e rol di CBA como un pilar di stabilidad financiero.
Su meta principal ta pa guia un banco central robusto, transparente y enfoca riba futuro, cu ta fomenta innovacion financiero y contribui na desaroyo economico sostenibel di Aruba. Tambe e tin como obhetivo pa mantene un relacion profesional y habri cu e sector financiero.
