Minister di Finanzas, Asunto Economico y Sector Primario, mr. Geoffrey Wever, hunto cu dos empleado di Directie Financiën, ta biaha pa New York, despues pa Londres y finalmente pa Amsterdam, unda nan lo reuni cu varios banco y inversionista internacional.

Segun un comunicado di gobierno, e bishita aki ta forma parti di un trayecto strategico pa fortalece posicion financiero di Aruba den mercado internacional. Durante 2026, Aruba tin un obligacion importante di refinancia parti di su debe nacional, cu ta suma un total di aproximadamente 506 miyon florin. Di esaki, un cantidad di cerca di USD 160 miyon na banco exterior. Esaki tin como meta pa refinancia ariba mercado internacional, prome cu e periodo di midterm elections, pa asina Aruba por cumpli cu su obligacionnan financiero na tempo.

Den e marco aki, Gobierno a dicidi pa diversifica su acceso na capital, no solamente den mercado Mericano, pero tambe door di amplia su presencia na Europa. E strategia aki ta enfoca riba mitigacion di riesgo y crea mas flexibilidad y opcion den mercado di capital internacional.

Tradicionalmente, Aruba a haci uso di mercado Mericano, pero mirando e desaroyo global y oportunidadnan den Europa, Gobierno ta considera esencial pa construi y fortalece relacionnan cu inversionistanan Europeo, segun e comunicado. Meta di e bishita aki ta pa introduci Aruba como destino confiabel pa inversion, comparti informacion riba e pais, y crea confiansa cu potencial partnernan financiero.

Durante e bishita, delegacion di Aruba lo tin un agenda intensivo cu reunionnan “back-to-back” cu diferente inversionista y institucion financiero. Den e reunionnan, lo pone enfasis riba posicion economico di Aruba, e progreso den maneho financiero, y e update positivo pa cu e evaluacion di Fitch Ratings na unda Aruba su ratings a upgrade, ademas di e proceso cu un segundo agencia di rating cu actualmente ta den desaroyo.

E dialogo aki ta crucial pa duna inversionistanan un bista claro di e stabilidad y potencial economico di Aruba, y pa fortalece e base pa participacion den mercado internacional.

Gobierno tin como meta pa completa e transaccion internacional di USD 160 miyon pa fin di april, mientras cu aproximadamente 280 miyon florin lo wordo refinancia den mercado local. Pa logra esaki, e preparacionnan necesario ta wordo coordina hunto cu Directie Financien y Banco Central di Aruba (CBA), pa despues somete e trayecto pa aprobacion na Conseho di Minister di Reino conforme e statuut.