Pa habri un negoshi of haci cambio den e permiso pa negoshi segun ley, mester haci un peticion pa permiso di negoshi via e website di Departamento di Asuntonan Economico, Comercio y Industria (DEACI) y ta ser otorga bao di responsabilidad di Minister di Asunto Economico.
Den e di cuater kwartaal di 2025, Aruba a sigui demostra un nivel halto di actividad economico y confiansa den iniciativa empresarial, segun e ultimo reportahe di Vestigingsverordening Bedrijven (VVB) prepara door di Departamento di Asuntonan Economico, Comercio y Industria (DEACI). E datonan ta confirma cu interes pa establece negoshi y pa inverti den Aruba a keda fuerte na final di aña, a pesar di e diferente reto economico internacional.
Durante e periodo di october te cu december 2025, un total di 1.311 peticion a ser ricibi pa permiso di vestiging y otro cambio relaciona cu negoshi. Di esakinan, 724 peticion a ser trata y e permiso relevante otorga, mientras cu 508 peticion ta aun den proceso. Un total di 79 peticion no por a ser trata pa motibo di falta di documento y of pago, segun e proceduranan vigente.
E mesun periodo a resulta den 1.225 vestigingsvergunningen (beschikkingen ministerial) firma, cu ta cubri tanto peticion nobo como peticion cu a ser entrega anteriormente. Di e total aki, 241 permiso tabata relaciona directamente cu e establecimento di negoshi nobo, loke ta subraya cu, te na final di 2025, iniciativa empresarial a sigui keda activo y resiliente.
E mayoria di e negoshinan nobo a ser registra den forma di VBA, sigui door di eenmanszaak, filiaal y NV, loke ta mustra un patronchi claro di structuracion empresarial orienta riba crecemento y profesionalisacion. E sectornan mas representa entre e negoshinan nobo tabata horeca, construccion y instalacion tecnico, comercio (incluyendo e-commerce), houdstermaatschappij y servicio personal manera kapsalon y salon di beyesa.
Segun Minister di Finanzas, Asunto Economico y Sector Primario, mr. Geoffrey Wever, e resultadonan di e di cuater kwartaal ta confirma cu e economia Arubano ta sigui move den un direccion positivo. “E cifranan ta mustra cu tin confiansa real den Aruba como luga pa inverti y pa cuminsa negoshi. Momentum economico no ta sucede casualmente; e ta resultado di stabilidad, claridad di maneho y un gobierno cu ta sigui traha pa kita barrera innecesario pa ciudadano y empresario,” segun Minister Wever.
Minister Wever ta enfatisa cu e vestigingsbeleid nobo, introduci na october 2022, a sigui contribui structuralmente pa acelera e proceso di otorgamento di permiso, mediante eliminacion di diferente rekisito, digitalisacion di henter e proceso y un enfoke claro riba stimulacion di actividad economico, incluyendo inversion den centro di Oranjestad y San Nicolas. Meta di e maneho aki ta pa emiti permiso den un periodo di dos siman, y e resultadonan di 2025 ta mustra progreso constante den e direccion aki.
Finalmente, Minister Wever a expresa su gradicimento na e team di DEZHI pa nan compromiso continuo y e manera profesional cu nan ta maneha e volumen di peticionnan, sigurando cu e proceso di permiso pa negoshi ta ser ehecuta na un forma eficiente, transparente y confiabel.
Tur informacion adicional riba e proceso pa permiso di negoshi ta disponibel riba e website oficial: www.deaci.aw.
