Pa habri un negoshi of haci cambio den e permiso pa negoshi segun ley, mester haci un peticion pa permiso di negoshi via e website di Departamento di Asuntonan Economico, Comercio y Industria (DEACI) y ta wordo otorga bao di responsabilidad di Minister di Asunto Economico.
Den e periodo di april te cu juni 2025 a ricibi 634 diferente tipo di peticion. Di e 634 peticion ricibi, a trata 245 peticion y a otorga e permiso relevante, 234 peticion ta den tramite,y no por a trata 155 peticion pa falta di documento y of pago.
Di e 634 peticion ricibi y e permiso relevante otorga, 201 ta peticion pa permiso nobo den e periodo di mei te cu juni 2025. Di e 201 permiso di negoshi nobo otorga, 27 tabata pa e eenmanszaak, 30 pa filiaal, 139 pa VBA, 3 pa NV y 2 pa un vennoot di un VOF. E tipo di actividad comercial pa cual mas permiso nobo a ser otorga ta actividadnan di Real Estate, houdstermaaschappij, compania di construccion, restaurant y otro tipo di local pa come, kapsalon y salon di beyesa. Pa e prome 6 luna di 2025 a duna un total di 402 permiso pa negoshi nobo.
Desde cu Minister Geoffrey Wever a introduci e vestigingsbeleid nobo october 2022, a zorg pa acelera e proceso di otorgamento di permiso door di elimina diferente rekisito, digitalisa henter e sistema di peticion pa permiso y stimula diferente sectornan economico, inversion den centro di Oranjestad y San Nicolas etc. Meta di e vestigingsbeleid nobo ta tambe pa emiti permiso den un periodo di dos siman, segun un comunicado di gobierno.
Tur informacion riba e proceso pa permiso di negoshi ta disponibel riba e website www.deaci.aw
