Minister di Finanzas, Asunto Economico y Sector Primario Geoffrey Wever, ta anuncia cu Moody’s Ratings a cambia outlook di Aruba for di ‘Stable’ pa ‘Positive’, mientras cu a confirma cualificacion di credito na nivel Baa3.
E decision aki ta representa un señal poderoso di confiansa internacional den e maneho economico di Aruba y ta confirma cu Aruba ta avansando den e direccion corecto cu disciplina fiscal, crecemento duradero y reformanan structural serio.
E cambio di outlook ta indica cu Moody’s Ratings ta mira un posibilidad real pa un futuro upgrade di nos rating. Pa logra esey Aruba mester mantene su trayecto actual di reduccion di debe, surplus fiscal y fortalecemento di finansa publico. Esaki ta sigui e reciente noticianan positivo di S&P Global Ratings y Fitch ratings, cu ambos a upgrade Aruba su rating e aña aki, mustrando cu e tres agencianan di rating mas importante di mundo awor ta reconoce progreso concreto cu Aruba a logra.
Segun e informe, Aruba su debe nacional ta sigui baha rapidamente y ta proyecta pa yega cerca di 50% di BNP pa 2031, loke lo nifica cu Aruba por logra su meta hopi prome cu anticipa anteriormente. Moody’s ta reconoce tambe cu gobierno a maneha recuperacion despues di pandemia di COVID cu prudencia, scogiendo paga debe y aumenta reserva en bes di subi gasto publico sin control.
Un elemento importante den e evaluacion ta e posibilidad creciente di aprobacion di e Rijkswet, conoci localmente como e trayecto di HOFA Rijkswet. Segun Moody’s, e ley aki lo fortalece arkitectura fiscal di Aruba, mehora supervision, reduci incertidumbre fiscal y, hopi importante, baha costo di interes riba parti di debe existente. E beneficio aki lo crea mas espacio fiscal pa inversion den pueblo, infrastructura y desaroyo economico.
Moody’s tambe ta enfatisa cu Aruba su credibilidad politico y institucional ta reforsa door di e relacion estrecho cu Hulanda. Cooperacion tecnico y financiero den Reino Hulandes ta sigui contribui na bon gobernacion, stabilidad macroeconomico y confiansa internacional den Aruba.
Minister Geoffrey Wever a expresa cu e decision aki ta un reconocemento importante di trabou serio cu gobierno a haci.
“E cambio di outlook pa ‘Positive’ ta manda un mensahe cla na mercado internacional, cu Aruba ta sigui avansa cu responsabilidad, disciplina y vision. Nos reformanan no ta solamente duna resultado riba papel, nan ta fortalece futuro economico di nos pais.”
E rapport tambe ta resalta fortalesa di Aruba su economia, cu crecemento fuerte den añanan recien, inversion continuo den hotelnan y aeropuerto, y reserva internacional cu a supera 40% di BNP na 2025. Esaki ta mustra cu Aruba no solamente a recupera, pero a sali mas fuerte y mas resistente despues di periodonan dificil.
Gobierno di Aruba ta mira e decision di Moody’s como un estimulo pa sigui ehecuta e Programa di Gobernacion AVP-FUTURO 2025-2028, enfoca riba finanzas publico sano, crecemento economico duradero, inversion strategico y bienestar pa tur ciudadano.
Aruba ta recuperando su posicion internacional, ta fortaleciendo confiansa di inversionistanan y ta construyendo un economia moderno, resiliente y prepara pa futuro.
