Minister di Finanzas, Geoffrey Wever (Futuro) ta informa cu e segundo cambio di Presupuesto 2025 a keda entrega na Parlamento di Aruba. Despues di ricibi e preguntanan di Parlamento riba e di dos cambio di Presupuesto 2025, Gobierno a manda e contestacion pa Parlamento di Aruba.

Mescos cu e prome cambio di Presupuesto 2025, e segundo cambio di Presupuesto 2025 tambe ta cumpli cu e normanan manera hancra den e ley di supervision manera menciona den varios conferencia di prensa riba ehecucion di e presupuesto 2025.

Meta primordial di Gabinete AVP-FUTURO ta un finanzas publico duradero segun normanan di presupuesto hancra den ley y duna e beneficio di e desaroyo economico back na comunidad. E segundo cambio di Gabinete AVP-FUTURO ta cumpli cu un saldo financiero di minimo 1 porciento pa e sector colectivo manera e Landsverordening Aruba Financieel Toezicht (LAft) ta prescribi. Ta premira un saldo financiero pa Pais Aruba di 1,7 porciento di e Producto Interno Bruto cu ta igual cu un surplus di 135 miyon florin y pa entidadnan cu ta forma parti di e sector colectivo un saldo financiero di 2,2 porciento cu ta igual na un surplus di 175 miyon florin. E nivel di debe ta premira di baha pa 61 porciento di Producto Interno Bruto. Gastonan di personal y goederen en diensten ta keda den e margen di e cuadro financiero. Entradanan di gobierno ta proyecto pa crece cu casi 30 miyon como resultado di e desaroyo positivo di Aruba su economia. Cu esaki Gabinete AVP-FUTURO ta cumpli cu ley.

Riba e mesun dia cu e gobierno nobo a wordo huramente, Gabinete AVP-FUTURO via un nota di cambio a duna bek di biaha na comunidad. Cu aprobacion di e nota di cambio di Gabinete AVP-FUTURO a baha e tarifa di inkomstenbelasting di 10 porciento pa 0 porciento, a hisa e suma di Reparatietoeslag pa 21 mil pensionado cu 250 florin extra tur luna desde 1 di mei y a baha e accijnzen riba gasoline y diesel pa tur usuarionan cu 10 cent tambe desde 1 di mei.

Prome cu final di 2025, Gabinete AVP-FUTURO lo defende e ultimo cambio di e Presupuesto 2025, un cambio di presupuesto cu tambe ta cumpli cu tur norma y regla, segun un comunicado di gobierno.

Gabinete AVP-FUTURO ta invita tur hende pa sigui e reunion publico den sala di parlamento riba 16 di december proximo. Ta importante pa e publico sigui e reunion aki cu ta trata e finanzas publico di nos pais, segun minister di Finanzas Geoffrey Wever.