Minister di Finanzas, Asunto Economico y Sector Primario, mr. Geoffrey Wever, ta contento di por anuncia cu a finalisa e prome fase di e proyecto “Revitalisacion di San Nicolas”.
Den e prome fase aki, e trabounan principal a consistí di diferente cambio, manera, ampliacion di e acera den centro di San Nicolas pa prepara pa e fluho di hende cu ta spera den futuro, a planta mata nobo, pa duna un ambiente mas atractivo y agradable pa tur bishitante y residente.
“San Nicolas ta un parti esencial di nos identidad cultural y economico. E esfuerso aki ta mustra e compromiso cu nos Gobierno AVP-Futuro tin pa revitalisa e districto, crea un centro mas bibo, atractivo y prospero, tanto pa nos pueblo como pa nos bishitantenan,” minister Wever a express.
E proyecto di revitalisacion ta un parti integral di e vision pa stimula economia local, atrae mas trafico di turismo na San Nicolas y fortalece e sentido di orguyo den e comunidad. Fase 2 di e proyecto lo inicia pronto, cu e meta pa renoba e stacion di bus di San Nicolas y construi un speeltuin pa nos hobennan y un farmers market unda nos agricultornan y artesanonan haya un espacio permanente pa bende nan productonan.
Gobierno AVP-Futuro ta compromete pa sigui traha hunto cu e comunidad y empresarionan di pariba di brug pa por ofrece un futuro nobo y vibrante na San Nicolas.
