Den cuadro di un strategia pa stimula empresanan nobo y diversificacion di Aruba su economia Minister di finanzas, Economia y Sector Primario, Geoffrey Wever (Futuro) ta introduci oficialmente un “Startersregeling” pa companianan nobo, dirigi na elimina barrera fiscal pa empresanan nobo y crea un clima fiscal mas faborabel pa empresanan nobo.
Minister Wever, den un comunicado di prensa, ta subraya cu e “Startersregeling” ta forma parti di e vision economico di Gobierno AVP-FUTURO, cu e meta pa stimula incorporacion di empresanan nobo den specialmente e Promising Sectors, manera defini pa Directie Economische Zaken, Handel en Industrie (DEZHI), pa stimula entrepreneurship, pa crea cuponan di trabao nobo y innovativo y pa crea entradanan nobo pa Gobierno.
E “Startersregeling” ta aplicabel specificamente pa empresanan nobo den e Promising Sectors, cu ta entre otro turismo cultural, turismo deportivo, economia di conocemento manera energia solar, tecnologia oceanico, educacion superior, ICT y FinTech y solucionnan insular orienta riba exportacion; logistica maritimo y di aviacion; economia agricola cu produccion local di alimento; economia circular cu enfoke riba reciclahe, waste-to-energy y deep seawater industries; y industria creativo manera arte, musica, diseño grafico, fotografia, web design, art studios y moda. “Cu e enfoke aki, Gobierno AVP-FUTURO ta pone pasonan concreto pa diversifica economia di Aruba”, segun Minister Geoffrey Wever.
Pa apoya empresanan den nan fase inicial, e areglo ta introduci un serie di incentivonan fiscal concreto durante e prome cinco aña despues di fundacion. Entre esaki ta un excepcion anual di ganashi te na Afl. 50.000, un deduccion di inversion aumenta te 20%, y un deducibilidad parcial di e montante principal di prestamonan comercial nobo. Tambe a crea flexibilidad den e rekisito di salario pa accionistanan cu tin participacion substancial y cu ta traha den nan mesun compania, basando esaki riba salario minimo legal. Den e periodo di start-up e areglo di empresario chikito pa BBO, AZV y BAVP ta wordo aplica durante e periodo e compania nobo no mester paga BBO, AZV y BAVP pa 5 aña. “E combinacion di e medidanan aki ta contribui directamente na mehora di liquidez, acceso na financiamento y reinversion continuo”, segun Minister Wever.
E “Startersregeling” ta aplicabel solamente pa companianan cu ta funda y cu ta establece na Aruba desde 1 di januari 2026 y cu tin un permiso di negoshi actividadnan den e Promising sectors. Empresanan cu ta participa mester demostra cada aña cu nan ta inverti minimo 15% di nan bruto-omzet den crecemento di e empresa, cu nan tin un nivel minimo di empleo di acuerdo cu nan volumen di actividad, y cu nan ta cumpli cu rekisito di presencia economico real na Aruba.
“Cu introduccion di e “Startersregeling”, Gobierno di Aruba ta haci un inversion consciente pa diversifica economia di Aruba, un maneho ta refleha un balansa claro entre stimulacion di iniciativa empresarial y beneficionan fiscal, cu como obhetivo final un economia mas diversifica, mas innovador y mas resiliente. E “Startersregeling” a drenta na vigor riba 1 di januari 2026 y ta marca un paso importante den e caminda pa crea un economia mas fuerte pa Aruba cu ta prepara pa futuro”, segun Minister Geoffrey Wever.
