Minister Geoffrey Wever: ya Aruba a haci su prome peticion pa subsidio di COHO; Cuater proyecto di reforma economico ta identifica pa mehora resiliencia

Un cambio di proceso di duna permiso, crea un ‘level playing field’ y percura cu por habri un cuenta bancario ta bira mas agil. Esaki ta parti di e trabaonan cu mester cuminza awor pa yuda reforma economia di Aruba y haci’e mas resiliente. Asina Minister di Economia, Comunicacion y Desaroyo sostenible, mr. Geoffrey Wever a informa Parlamento ayera.

E Minister a bin duna informacion riba e investigacion cu Economisch Bureau Amsterdam, EBA a haci riba e estado di economia di Aruba y particularmente e procesonan cu ta stroba un desaroyo economico. EBA a haya asistencia di mr. Richard Flanegin, hurista Arubiano cu experticio riba e cuadro legal di permisonan na Aruba, cu ta un aspecto crucial di e redtape of burocracia na Aruba. E motibo pakico e Minister a pidi pa bay Parlamento ta pasobra Conseho di Minister a haya e rapport di EBA, y de acuerdo cu palabracion haci cu Hulanda, ta publica e rapport awe.

Pero prome cu publica e rapport pa publico general, Minister Wever a haya importante pa duna Parlamentarionan informacion clave di e rapport, pa asina legisladornan por compronde e meta di e investigacion y alabes splica kico e aspecto di reforma manera ta poni den e landspakket ta encera, den e caso aki e reforma economico. Segun e Minister, Parlamento tambe tin un papel pa hunga den e trayectoria.

Geoffrey Wever a cuminza pa bisa cu no tur e imagen ta malo. Aruba compara cu region ta relativamente bon para, cu un di e entradanan pa cabez mas halto y e debe compara cu Producto Interno Bruto cu na 2020 a baha na 2021 na 107 porciento (red. debi na crecemento economico despues cu Aruba a habri su economia). Segun e Minister, Aruba tin institutonan fuerte y a base di evaluacion den region atrobe, ta sali relativamente bon riba e categorianan di estado di derecho, control di corupcion, efectividad di administracion publico y cantidad di regulacionnan.”Pero tin reto. Tin un debe halto, tin embehecimento, gasto salubridad publico halto y preocupacion riba mercado pa haci negoshi cu ta inclui mercado laboral y di capital, producto y servicio ademas di legislacion anticua ta stroba e clima di negoshi na Aruba.

Wever a ilustra tur e leynan cu ta central den reforma economico cu ta inclui e leynan cu ta referi na permisonan, for di tereno te na negoshi y hasta di trabao. Den e diferente leynan tin obhetivonan anticua, por ehempel e vestigingsvergunning ta di 1945 y ya no ta cla kico ta su obhetivo. “Pa mehora empresaria (ondernemerschap) y clima di inversion lo mester cambia e sistema di permiso, baha gasto di haci negoshi y elimina redtape,” Wever a enfatisa. “Ta cambio structural pa mehora posicion di economia di Aruba.”

Enfoke riba implementacion

EBA a haci un revision integral y a bin cu recomendacion pa mehoracion cu enfoke riba implementacion. “Tin hopi rapport bon prepara pa nos mesun hendenan, pa hopi aña caba pero nunca ta keda implementa. Riba e topiconan tin mas o menos 25 rapport bon skirbi. A usa e rapportnan aki pa yega na e recomendacionnan. Asina a deduci 150 punto cu mester cambia pa mehora clima di inversion. Pero 150 ta hopi. Cada uno ta costa tempo, y mester di capacidad legislativo y di experiencia.”

E 150 puntonan ta reparti den tres topico cu ta e facilidad pa haci negoshi, stimula empresaria y mehoracion di mercado. Cada uno ta refleha den e cuater proyectonan di e 150 describi den e rapport, cu kier implementa. “Ora ta papia di mercado ta esun laboral cu ta basa riba leynan hopi anticua y mercado di capital. EBA mes ta papia di mercado di capital, pero den contexto cu tur hende mester tin cuenta di banco y por habri un cuenta di banco. Pero e mercado tambe ta encera e servicio y producto y proteccion di consumidor.”

Estimulo di empresaria so ta cana bon

A haci un revision con leu ta cu e tres topiconan aki. Di e tresnan, unicamente stimula empresaria ta cana bon, den sentido cu tin curso y tayer pa yuda empresarionan. Sinembargo e facilidad pa haci negoshi ta limita mientras cu mehoracion di mercado ta ausente. “A tuma paso den pasado pa facilita e proceso pa haci negoshi, por ehempel dor di elimina e exigencia di no-obhecion prome cu pasa notario. Tin diferente proceso di digitalisacion a tuma luga na Direccion pa Asuntonan Economico y a baha e prijs pa un vestigingsvergunning di 4000 pa 2000. Aunke nan ta mehoracion, ainda ta leu di cas.”

EBA ta bisa cu locual a keda atras ta e terminonan final, unda cu e organo cu ta otorga e vestigingsvergunning tin 12 siman pa duna decision, pero si no contesta, e empresario no tin ningun otro caminda pa cana cu entrega un obhecion a base di negacion ficticio. “E ora e empresario mester busca abogado, ata Gobierno ta keda sin contesta y tin storia cu empresarionan mester warda un aña prome cu nan por cuminza. Mesun cos ta conta cu e LTU (ley admision y expulsion stranhero) unda no ta tuma decision mesora, cu ta hisa e gasto pa haci negoshi. EBA ta conclui cu algun di e areglonan no tin ni termino den cua mester duna contesta. Tin un sistema cu no ta funciona. EBA ta sugeri pa bin cu un sistema cu denter di e termino cu ley ta determina no a duna contesta, cu e permiso ta bin ‘van rechtswege,’” Wever a splica.

E clausula aki ta den proceso di cambio den leynan di Aruba, unda ta tene cuenta cua actividad no por cay bao e areglo nobo aki. Tur esaki ta pa brinda comerciante proteccion, pasobra na e momentonan aki, sin e proteccion e ta dificil pa e comerciante y e por fada. Y riba dje, esnan cu mester duna permiso no ta asumi responsabilidad tampoco. “E resultado di nos sistema awor ta cu comerciantenan ta yama e ambtenaarnan direct, of hasta e Minister y por produci situacionnan cu no kier (soborno),” Minister Wever a remarca.

One Stop Shop

Pa loke ta e One Stop Shop ta cu toch ta rekeri e mesun documentonan na diferente instancia. EBA ta sugeri pa organisa e sistema unda pa medio digital ta entrega documentonan un solo biaha, y e diferente departamentonan lo por sigui traha, teniendo cuenta cu e maneho di diferente Ministernan. E integracion aki mester sosode ainda. “E ta haci e topico mas sensitivo, ya cu algun Minister lo mester entrega algun autoridad cu ta bay resorta bao e Minister pa Asuntonan Economico, ora ta trata permiso pa negoshi. Pero tin un otro modelo cu ta bisa cu ta suavisa e proceso na ora di entrega y unabes cu esaki sosode, cada Ministerio lo determina su maneho.” E trabaonan cu ta bay tuma luga awor lo duna e recomendacion cua modelo pa scoge.”

Mercado

Leynan laboral ta hopi rigido, no ta stimula expansion. Pero tin un investigacion separa tumando luga riba e tema aki. Locual si EBA a propone ta revisa e mercado di capital unda ta introduci produccion di mercado y di consumidor entre otro cu un Fair Trade Authority, cu tin su base di e ley di competencia husto cu Parlamento a pasa caba.

A scoge cuater proyecto pa traha riba dje basa di e criterianan di implementacion, visibilidad y impacto, sosten amplio y prioridad di Gobierno. Pues e enfoke di e reformanan economico lo ta:

Mehoracion y agilisacion di decisionnan riba permiso; coherent vergunning stelsel achter een loket, introduccion di e Aruba Fair Trade Authority y cuater: habilidad pa por habri un cuenta bancario mas facil. Pa ta e aspecto di revision di mercado laboral, ainda e investigacionnan tumando luga.

Bon Dia Aruba lo amplia riba e investigacion di EBA y e consecuencia financiero pa Aruba. Algun di e proyectonan Aruba lo por carga, pero e Fair Trade Authority ta uno caro pa hinca den otro, sinembargo necesario. Pa tal motibo mes, e prome peticion pa subsidio di COHO a bay Hulanda caba.

Mester bisa cu Parlamentarionan tabatin hopi pregunta y e sesion di tres ora programa a bira cuater ora y mey