Hunto cu stakeholders y fortaleciendo e futuro di educacion y economia na Aruba, PEL a duna inicio na Siman di evaluacion di sector. Un evento importante organisa pa Plataforma Educacion y Labor (PEL), cu e meta pa valida y fortalece programanan di enseñansa profesional den e sectornan clave di Aruba.
E proceso aki ta fundamental pa sigura cu e programanan ta keda relevante pa e demandanan di mercado laboral y prepara nos studiantenan pa futuro, den un mundo di trabou cu ta cambia rapidamente.
Como Minister di Educacion, sra. mr. Gerlien Croes, tabata presente pa habri oficialmente e evento aki, enfatisando riba e compromiso di Gobierno di Aruba pa traha man den man cu institucionnan educativo, sector laboral y comunidad. Den su discurso di apertura, Minister Gerlien Croes a destaca cu e conexion fuerte entre educacion, pasantianan y economia ta esencial pa crea un base solido pa desaroyo di nos hubentud y pa construi un pais cu oportunidad pa tur ciudadano.
“E siman di evaluacion di sector ta un paso crucial pa unifica esfuerso y pa traha riba un sistema educativo moderno y visionario. Nos mester prepara nos studiantenan cu e habilidadnan pa logra exito den un mundo laboral cu ta evoluciona constantemente”, Minister Gerlien Croes a expresa.
Durante e siman, cu a tuma lugar na Auditorium di Colegio EPI, tabatatin sesionnan di dialogo y evaluacion unda a reuni cu representantenan di educacion, empresanan, gobierno y otro stakeholdernan importante.
E consulta a habri cu gran entusiasmo y colaboracion, marcando un paso mas den e caminda pa un sistema educativo fuerte y sostenibel cu ta responde na e necesidadnan di nos sociedad y economia.
