Ministerio di Enseñansa tin e honor di anuncia e inicio oficial di e restructuracion di salarionan den sector di enseñansa. Dia 23 di januari 2026 venidero, maestro y dirigente di scol lo ricibi nan prome salario segun cambionan salarial cu a drenta na vigor desde 1 di januari 2026. Ta ehecuta e cambio aki un dia prome cu e fecha simbolico cu ta coincidi cu Dia Internacional di Enseñansa di UNESCO, cu ta 24 di januari.
Segun un comunicado di gobierno, e reforma aki ta parti di un trayecto den dos fase, cu tin como meta principal reconoce y balora e rol fundamental di enseñansa como motor di desaroyo social y transformacion comunitario.
Fase 1 (2026–2028): Reconocemento y coreccion di desigualdad
E prome fase ta enfoca riba coreccion di desigualdadnan historico den escalanan salarial y riba un trato husto segun nivel di diploma.
Aki ta trata cambio relaciona na:
comienso di un ‘gelijktrekking’ den fase pa maestro di scolnan primario;
‘toelagen’ igual pa dirigentenan di scol;
incorporacion di ‘toelagen’ di dirigentenan den ‘pensioengrondslag’;
subida di salario segun 1 ‘periodiek’ desde 1 di januari 2026 y 1 ‘periodiek’ desde 1 di januari 2028 pa docente di otro tipo di scol.
Subida di salario segun 1 ‘periodiek’ pa 98 assistent di klas cu ta haya un salario segun un ‘schaal’ di e structura salarial di docente. Aki ta trata tambe e comienso di un ‘gelijktrekking’ di salario den comparacion cu assistentnan cu ta haya un salario segun un ‘BRA-schaal’. ‘Gelijktrekking’ acelera pa maestro di scol primario cu ta yega un edad di pensioen entre 2026 y 2028.
E cambionan aki ta marca un paso importante pa fortalece dignidad profesional, siguridad pa pensioen y stabilidad den e sector educativo.
Fase 2: Profesionalisacion y Innovacion Educativo
Den fase 2, profesionalisacion lo bira un pilar central den e sistema salarial nobo. Crecemento profesional y personal di maestronan lo ta directamente alinea y liga na progreso den nan re-numeracion.
Como parti di e profesionalisacion, Gobierno lo inverti den un concepto agogico moderno, enfoca riba:
participacion activo di hubentud;
mas bos y participacion di studiante den nan mesun formacion;
y un cultura di co-creacion entre docente, alumno y comunidad escolar.
E enfoke aki ta reconoce cu e alumno no ta solamente receptor di enseñansa, sino actor esencial den diseño di su propio futuro educativo.
Cu e prome cambio salarial di maestro cu ta ser ehecuta un dia prome cu Dia internacional di Educacion, Aruba ta manda un señal cla: inversion den docentenan, den profesionalisacion y den bos di hubentud ta inversion den futuro di nos sociedad, segun e comunicado.
