E tormenta politico entre oposicion y gobierno ta sigui crece na Aruba despues cu lider di fraccion di MEP Evelyn Wever-Croes a haci preguntanan serio riba conducta di Minister Gerlien Croes tocante un biahe den jet priva pa Corsou. Den un Facebook Live recien, Wever-Croes a amplia riba e motibo pa cual e ta insisti cu minister Gerlien Croes tin cu mustra prueba claro cu e mes a paga pa e vuelo den e jet priva di dia 19 di november.

Segun Wever-Croes, minister Croes tabata tin autorisacion formal di Conseho di Minister pa un biahe cu tabata programa pa dia 20 di november. El a informa Parlamento y tabatin su documento regla, siguiendo e procedemento cu ley ta exigi. Pero e controversia a surgi ora cu e mandatario a dicidi sali un dia mas prome—dia 19 di november—cu a coincidi cu e yegada di e seleccion di futbol di Corsou despues di nan clasificacion pa mundial.

Parlamentario Wever-Croes ta afirma cu esaki no tabata cubri pa ningun decision nobo di Conseho di Minister, y cu e forma den cual e vuelo a tuma luga por representa un violacion di codigo di conducta pa minister. E codigo aki ta prohibi ministernan di ricibi regalonan di gran balor economico.

Durante su transmision, Wever-Croes a insisti riba importancia di transparencia. Un minister, el a indica, “no por bula den un jet priva, hay’e di regalo cabey boto pa bay cune, pasobra e ta un regalo di un balor demasiado grandi.”

Segun e parlamentario un jet priva, cu por trankilamente costa entre cuatro y cinco mil dollar, no por keda sin un splicacion ni sin prueba di pago. Pa e motibo aki e ta insisti cu pueblo mester haya un prueba real cu e minister efectivamente a cubri e gasto cu su propio placa.

Wever-Croes a manda pregunta den Parlamento pa minister Gerlien Croes y prome minister Mike Eman, pero no a ricibi respuesta directo na e preguntanan. Minister Croes a reacciona mandando documento cu e a presenta como prueba na Parlamento, pero segun e lider di fraccion di MEP, niun tabata coresponde cu e vuelo specifico di 19 di november. El a indica cu minister Croes a manda papel pa otro biahe, aparentemente pa confundi situacion, pero sin toca e unico documento cu ta importante: un factura y un recibo legitimo di e vuelo den jet priva.

P’esey, segun e miembro di Parlamento, e caso ta bira hopi mas serio. No solamente ta trata di si un minister a ricibi un regalo prohibi; tambe ta trata di si Parlamento a ser confundi of incluso engaña cu documento no relevante. El a insisti cu dos siman completo a pasa sin cu minister a presenta e prueba.

Alabes el a lamenta cu, enbes di duna claridad, segun e, minister Croes ta supuestamente stimula atake politico riba red social, mientras cu e por a resolve e situacion cu un documento cla. “Si bo mes a paga, bo no tin nada di sconde, bo ta publica cu bo a pag’e e ora. Pero e no kier haci esey,” el a remarca.

E lider di fraccion di MEP, y ex prome minister, a adverti cu e situacion lo por tin consecuencia amplio pa gobernacion den Aruba. E ta pone enfasis riba peliger cu surgi ora cu un oficial di gobierno ta keda debe fabornan grandi na comerciante. El a subraya cu si un comerciante duna un regalo of fabor di e magnitud aki, e mesun persona despues ta bin cobra un fabor politico.

Esaki, el bisa, ta e raiz di corupcion. “Ora ministernan debe comerciantenan fabor e ta hopi peligroso pa bo estado di derecho, e ta hopi peligroso pa democracia den bo pais, pasobra no ta e minister ta goberna mas, e comerciantenan, cu a dun’e fabor, cu e debe fabor, ta esunnan cu ta manda,” el enfatisa.

El a subraya cu sistema politico ta bira debil ora integridad ta ser poni na banda y ta netamente p’esey nan a traha leynan di integridad y un codigo di conducta pa ministernan pa preveni precisamente e tipo di situacion aki.

A pesar di tur pregunta manda na minister Croes y tambe na prome minister Mike Eman, Wever-Croes ta bisa cu respuesta no a yega. Den parti di documento entrega, segun e, tabatin papelnan no corespondiente. El a indica cu a pidi e mandatario pa presenta den “vragenuur urgente” pa e duna cuenta di e biahe aki, pero e mandatario no a presenta.

Despues di dos siman sin claridad, oposicion a dicidi pasa e caso na autoridad competente pa investigacion mas profundo. “Nos trabou parlamentario por yega te aki y p’esey awor nos ta pasa e caso den man di autoridadnan di Aruba pa nan sigui investiga. E unico cos cu nos tabata kier pa e haci ta prueba loke el a bisa. Ta importante pa pueblo di Aruba haya sa,” el a bisa.

Di su banda minister Gerlien Croes no a keda atras y a publica un serie di declaracion riba su pagina di Facebook, refutando tur acusacion y a indica cu tur e trabou di oposicion den su contra ta trata simplemente di un campaña politico. Segun e mandatario, oposicion ta usa e caso pa distrae pueblo for di investigacionnan cu segun e ta tuma luga riba maneho di placa di gobierno den tempo cu MEP tabata den poder.

El a bisa cu e liderazgo di MEP mester ta preocupa pa investigacionnan continuo riba supuesto abuso y irregularidadnan financiero durante su añanan den gobierno y cu supuestamente tin caso cu un bufete a gana nuebe miyon florin den un periodo di seis aña. Croes a publica como prueba un di e documento di e varios keho cu segun e MEP y su lider mester worry cune.

Den un publicacion anterior, 25 di november, minister Croes a indica cu el a presenta su verslag pa e biahe en cuestion. Segun e, el a biaha sin pidi daggeldvergoeding ni representatiekosten, cu normalmente ta suma rond 2.500 florin, pasobra hotel tabata all-inclusive. Alabes el a puntra si ministernan durante gobierno di MEP tabata entrega nan gasto no usa of nan verslag manera cu ta spera di dje awor.

E caso no ta duna señal di calma. Pa un banda, oposicion ta bisa cu ta trata di integridad, transparencia y respet pa codigo di conducta. Pa otro banda, minister Croes ta mira esaki como un serie di atake infunda, dirigi cu proposito politico y sin base den realidad.