Minister di Labor, Energia y Integracion, Glenbert Croes a ofrece un conferencia di prensa e dia di ayera pa informa comunidad tocante e biahe cu el a haci pa Merca, specificamente pa Washington, den cual el a reuni cu diferente representante di departamentonan Mericano.

Di esaki, el a señala cu el a bay cu e meta di pidi Gobierno Mericano a traves di diferente departamentonan nan consideracion, comprension y apoyo pa e peticion di Gobierno di Aruba. Den bista di e relacion entre Gobierno di Merca y Gobierno di Venezuela, paisnan den Caribe no ta un excepcion pa loke ta trata e crisis energetico cu consecuencia di prijsnan halto di energia, awa y coriente cu ta bin afectando comunidad y economia fuertemente, impulsa pa prijsnan di petroleo, principalmente heavy fuel oil cu Femsa y Refineria di Aruba (RDA) ta cumpra.

“Cu si nos logra di por cumpra heavy fuel oil di origen Venezolano, den cual indicacion di mercadonan ta cu e descuento cu bo por haya na e momentonan aki na Venezuela ta asina grandi; mas grandi e descuento ta, mas hopi bo prijs di awa y coriente ta baha”, minister Croes a enfatisa.

Igualmente nan ta bin check tur e mercadonan pa wak unda otro tin posibilidad pa Aruba por tin un alternativa mientras tanto, y nan ta den proceso na e momentonan aki cu Gobierno di Merca, unda cu Ecuador tambe ta un alternativa cu ta riba mesa.

Ekipo di embahada di Hulanda tabata hopi importante den e biahe aki, pa motibo cu a duna sosten na e diferente reunionnan cu a tuma luga, conhuntamente cu minister plenipotenciario na Merca, Sra. Joselyn Croes, loke tambe a duna un forsa pa nan solicitud por haya oido.

“Mi ta sinti cu Gobierno Mericano tin oido pa e solicitud aki di Gobierno di Aruba, unda cu no ta Aruba so cu a expresa e preocupacion aki, sino cu varios paisnan den Caribe a expresa esey. Mientras nos ta den e transicion energetico, bayendo pa gas y expandiendo nos wind farm, nos ta expandiendo solar, bateria. Nos ta haciendo full e proceso di transicion energetico cu ta e caminda no solamente pa tin un medio ambiente limpi sino un pais limpi pa nos comunidad y pa por baha prijs di awa y coriente permanentemente”, el a declara.

Pa Aruba, tin plania cu den aproximadamente 30 luna mester surpasa e momentonan dificil, sinembargo, ainda tin e energetico causa door di e guera di Rusia cu Ucrania, cu ta afecta e prijsnan di petroleo y ta afecta prijs di fuel oil. Pa e motibo aki mester duna e oportunidad na FMSA y RDA pa cumpra heavy fuel oil mas barata, cu e solo proposito di por baha prijs di awa y coriente mientras cu Eagle LNG ta implementa su proyecto. Ta kere cu aki 30 luna WEB Aruba N.V switch pa gas natural, pa asina e prijs di heavy fuel oil no lo tin un efecto asina pisa mas riba prijs di awa y coriente.

Awe ta bay tin Conseho di Minister unda tambe ta bay duna informacion di kico e plan ta pa cu e solicitud di gobierno di Aruba haci via canalnan diplomatico cu Gobierno Mericano, pa Aruba por haya e respuesta oficial sabiendo cu esey por dura. Minister Croes a reuni tambe cu representantenan di embahada di Ecuador cu apoyo di embahada di Hulanda na Washington, pa Gobierno di Ecuador a traves di nan compania nacional di petroleo “Petroecuador” considera Aruba como un pais na cual nan por bende heavy fuel oil.

“Nos mester actua cu urgencia riba e tema di logra un acuerdo, sea cu Ecuador of cu Venezuela, riba e compra di heavy fuel oil”, minister Croes a sigura.

Ademas, tin diferente proyecto relaciona cu e zona di refineria, segun minister Croes a señala. Entre otro ta bay tin Eagle LNG y otro candidatonan cu pronto ta bay keda anuncia, unda ta bay tin diferente inversionnan cu lo representa kisas un inversion hopi mas cuantioso di loke tabata e refineria riba su mes, pero ta diferente proyectonan den industria energetico cu ta bay crea cupo di trabao, impacto economico, entrada pa Gobierno di Aruba, entre otro.

“E zona di refineria, en bes cu bo ta bay wake como un zona sushi, bo ta bay mir’e como un zona limpi di industrianan energetico y moderno operando a base di gas cu ta un fuel limpi”, minister Croes a señala.

Luna di october venidero ta esun unda cu Gobierno di Aruba mester tuma un decision, pa motibo cu tin e infrastructura di e refineria, tin cierto ekiponan cu ta den bon estado cu lo por wordo usa pero tin ekiponan riba cual tempo ta haci su impacto cu consecuencia pa su estado, cual ta hopi deteriora.

Minister Croes tambe a specifica cu e situacion no ta delicado entre Aruba cu Venezuela, sino cu ta un situacion delicado pa e relacion entre Merca cu Venezuela cu no ta afectando solamente Aruba. “Den caso di Aruba nos trading partner mas importante ta Merca y Gobierno di Aruba lo no permiti cualkier N.V di gobierno haci esfuerso cu Venezuela cu lo por afecta nos relacion cu Merca.”

Pa e motibo ey, Gobierno di Aruba a dicidi di tuma canalnan democratico y haci esfuerso via embahada ademas di Ecuador, cu no ta wordo haci via companianan. Segun minister mes a sigura, nan lo bay proximamente na Ecuador pa por finalisa e acuerdonan y el a bisa cu esaki ta un relacion cu ta wordo coordina entre gobiernonan y companianan di gobierno. “Pero mi ta kere cu ta vale la pena pa haci esfuerso cu Gobierno di Merca tambe, pasobra si un dado momento, si tin un porciento di chens pa por cumpra heavy fuel oil di origen Venezolano unda cu bo por haya un descuento hopi mas grandi cu lo significa un reduccion di awa y coriente hopi mas grandi, obviamente e ta vale la pena haci esfuerso.”