For di siman pasa, tema di migracion y integracion ta bin dilanti pa loke ta trata un caso specifico cu a keda conoci ora un persona di nacionalidad dominicano a wordo laga den libertad for di Guarda Nos Costa cu un permiso unda cu e funcionario publico Mario Wever ta firma un VTA pa e persona en cuestion.

Pa cu esaki, minister di Integracion, Labor y Energia, Glenbert Croes a ofrece un conferencia di prensa pa asina duna mas claridad tocante e caso aki, ademas di duna informacion tocante maneho di admision y di integracion, cu proximamente ta bay anuncia diferente cambio y diferente modalidad di permisonan nobo cu ta bay bin pa mehora e servicio na DIMAS y DPL, segun loke el a señala.

Ademas el a enfatisa cu esaki ta bay tuma luga teniendo na cuenta e maneho laboral cu e ta hibando, di duna e yiunan di tera preferencia. Pero tambe den balans di politica di integracion.

Croes a informa cu el a haya hopi critica den dianan aki caminda cu el a splica cu tin un diferencia grandi con e ta hibando e funcion di minister di Labor y Integracion compara cu ministernan anterior. El a expresa cu “Glenbert Croes no ta tuma placa ni bao mesa, ni riba mesa”.

Caso Ariel Lopez

Ariel Lopez, un persona di nacionalidad Dominicano, a bira conoci siman pasa na momento cu e website local 24ora a informa cu trahadonan di Guarda Nos Costa (GNC) a pone nan trabao plat pa motibo di salida di Lopez cu un VTA otorga pa DIMAS, despues cu e tabata deteni na GNC. Relaciona cu esaki, Croes a lesa documentonan di su caso ora cu a cuminsa informa cu Lopez a drenta Aruba dia 7 di november di 2019 cu obhetivo di estadia turistico.

Den e documentonan aki ta informa cu 28 di januari 2020 ta entrega un peticion di estadia, como personal domestico (huishoudelijk personeel) pa Lopez, cu ta wordo nenga dia 21 di april di e mesun aña. Lopez ta apela dicho negacion y riba dia 16 di november 2020, e apelacion ta wordo declara nulo: ‘ongegrond verklaard’.

E persona aki ta mantene un relacion sentimental cu Rossana Miguelina Groeneveldt, naci na Aruba, y for di e relacion aki a nace un yiu, unda cu mester haci proceso di establece paternidad via test di DNA.

Mas o menos mesun temporada cu ta entrega e peticion pa gezamenlijk gezag na Corte, Lopez ta wordo deteni door di GNC, pasobra durante un control di trafico ta resulta cu e no tin status legal. Pero door di pasa pa diferente proceso, el a logra entrega un peticion pa un permiso di estadia a base di ‘bijzondere band met Aruba’.

Pero prome cu esey, door cu GNC a detene Lopez caba, a drenta un veredicto di hues pasobra Lopez a entrega un voorlopige voorziening pa schors e werking di e decision di deportacion door cu e ta bay trece un ‘onevenredig nadeel’ pa Lopez. Pa cu esaki, e hues ta cuminsa bisa cu e decision y consideracion di e hues den casonan asina ta di caracter provisional y temporal y cu e no ta obligatorio den un bodemprocedure y por lo tanto a considera e deportacion rechtmatig, basa riba e hecho cu e tata a drenta Aruba desde november 2019 y a keda cu status ilegal na Aruba desde e temporada ey; y e hecho cu Lopez ta den espera di decision di su peticion pa permiso no ta cambia esaki.

Den esaki, Croes a menciona cu maneho di admision y integracion di Pais Aruba ta wordo determina door di gobierno, specificamente door di minister encarga cu Integracion. Cu esaki den consideracion a reactiva un comision di conseho di Admision y deportacion: Adviescommissie Toelating en Uitzetting (ATU).

Manera e hues a enfatisa den su decision provisional/temporal durante e caso di Ariel Lopez, su decision:
1- ta regarda un peticion pa un medida provisional y temporal,
2- ta basa riba e dossier manera cu el a ricibi y no por exclui cu ta carece di documentonan cu por a haci cu el a yega na un otro decision, y
3- ta temporal, ya cu ainda mester wordo determina door di minister di Integracion si e persona en cuestion ta bin na remarca pa un permiso di acuerdo cu su maneho.

Despues a determina cu Lopez a cana e proceso completo debidamente, a entrega su peticion na DIMAS pa un permiso, a cumpli cu tur e rekisitonan pa cu e peticion aki segun e maneho vigente, y ta bin na remarca pa un permiso di estadia di acuerdo cu e maneho existente di Admision y Integracion, pa cual motibo a bay over na honra su peticion.

Redactor di Bon Dia Aruba a haci un par di pregunta na Croes. Permiso di VTA (voorlopige toelating tot Aruba) ta mara na un prome permiso positivo cu mester warda pafo di Aruba segun ley; pa DIMAS duna un VTA e persona mester cumpli cu algun rekisito. Mirando cu meneer Ariel Lopez tabata for di november 2019 ilegal na Aruba, ¿cua ta e base legal y na cua permiso e VTA specifico aki a wordo firma dia 3 di februari door di Mario Wever?

Pa cu esaki, Croes a contesta cu mediante e maneho nobo cu el a implementa, ta permiti pa e persona por ta na Aruba. “Lo ta irealistico for di nos mirando cu a cera frontera pa tur hende cu a keda ilegal na Aruba cu no por bay back na nan pais. Nos ta hibando maneho di Integracion unda cu nos ta percurando pa nos yiu di tera haya e prome escogencianan. Nos ta hibando un politica di integracion unda cu nos kier cu si bo ta ilegal y b’a drenta legal, bo ta purbando di legalisa bo estancia, bo ta wordo brinda e oportunidad pa legalisa bo instancia. Ta imposibel pa e ora nos mester exigi pa e sali for di Aruba. Den e maneho nobo cu mi ta hibando, nan por keda na Aruba warda tanten cu nan por demostra cu nan ta den proceso di solicitud di permiso. Unabes cu su permiso ta nenga, e ora ey mester repatria”.

 

A puntra Croes ¿for di ki dia maneho nobo a drenta na vigor? Y el a declara cu for di dia el a sinta como minister den Gabinete Wever Croes II.

Tambe a puntra Croes, mirando cu Lopez tabatin un orden di deportacion legal, valido y a ser revisa pa un hues, ¿dicon a opta toch, pa literalmente sak’e for di GNC? Croes a bisa cu pa via di un bijzondere band met Aruba “hues ta evalua circunstancianan di e momento ey y esey no ta interumpi e proceso pa solicitud di permiso continua”, el a finalisa.