– SMOA a cuminsa un caso contra minister di Enseñansa pasobra tin un conflicto cu gobierno riba e rector di Colegio Arubano. E minister a rechasa e peticion pa subsidio pa e rector nobo y awor minister a reacciona, dunando e motibonan.
SMOA ta e directiva di Colegio Arubano. E intencion tabata pa busca un candidato locual pero nan ta bisa cu nan no a logra. Nan a haya un candidato for di Hulanda pero awor minister tin problema cu su edad (61) cu esaki ta mucho halto. E caso ta pa trece claridad riba e punto aki, segun SMOA.
E minister ta mustra ‘su desapunto den tanto e Presidente di SMOA y e Directiva pa keda insisti cu ta un candidato Hulandes Europeo so por fungi como lider di e scol.
“Ta di lamenta cu SMOA ta bolbe entama un caso contra maneho di Gobierno. Manera mi a comunica anteriormente, Gobierno a informa SMOA cu e salario di e rector nobo cu kier nombra pa Colegio Arubano no ta subsidiabel debi na su edad (61), banda di e hecho cu nan intento ta pa nombr’e pa 5 aña. Esaki pa mi no ta aceptabel pa varios motibo. Na prome luga, esaki ta contra e maneho y ley di Gobierno stipula encuanto edad di pensioen y na ki momento un dirigente di scol lo baha cu pensioen. E maneho aki a wordo aplica pa varios aña y SMOA mes a aplica esaki na momento cu e Rector anterior Jossy Tromp mester a baha cu pensioen ora el a yega e edad di 60 aña. Si awor SMOA ta desea di haci un excepcion riba e maneho aki, lo por a haci esaki pa varios candidato local mas”, asina minister Michelle Hooyboer-Winkaar a declara.
Den e caso cu e rector anterior Hans Timmermans SMOA tambe a firma e contracto sin cu a consulta cu Gobierno prome pa e subsidio, segun e minister. “Den e proceso aki a resulta cu SMOA a neglisha y ignora varios ley y regla vigente pa loke ta suma di salario, edad y demas beneficionan secundario cu no ta aplicabel y cu Gobierno no ta subsidia.”
