Minister di enseñansa, ciencia y desaroyo sostenibel, Rudy Lampe a declara na Bon Dia Aruba cu su ministerio a manda un carta pa e sindicatonan cu ta representa e empleadonan di Traimerdia.
Nan ta tres sindicato, SEPPA, TOPA y SIMAR, y actualmente e mandatario ta wardando un contesta despues cu a aclaria cu e proyecto Traimerdia lo sigui. Lampe a reitera cu e proyecto Traimerdia ta importante pa nos pais, y e lo continua. Pa augustus 2019, e servicio aki lo keda duna na nos comunidad.
E proposicion cu e sindicatonan a bin cune di parti di e trahadonan ta si denter di e proyecto di Traimerdia lo por haya un contract di trabou pa 40 ora pa siman. For di hopi aña y practicamente for di inicio di e proyecto aki, e empleadonan ta traha 31 ora pa siman, y ta wordo paga pa e suma ey, segun Lampe.
E mandatario a bisa cu nan ta wardando un contesta riba e proposicion cu su ministerio a bin cune. E proposicion aki ta un alternativa pa esunnan cu kier haci un trabou di 40 ora pa siman. “Esey nos ta wardando aworaki, un contesta di parti di sindicatonan riba e proposicion cu nos a haci,” el a laga sa na e matutino aki.
E mandatario a afirma cu di nan banda, nan no ta mira niun problema pa e proyecto aki sigui duna su servicio.
