Ayera mainta, Marisol Lopez-Tromp a ofrece su prome conferencia di prensa como minister di Asuntonan di Desaroyo Teritorial, Infrastructura y Medio Ambiente, den cual el a papia tocante su rol como minister y a duna un splicacion pa loke ta su vision den ministerio.

Lopez-Tromp a comenta cu na Aruba hende tin un pensamento hopi mas critico pa loke ta e desaroyo di e isla, na unda di un banda kier stimula e economia y di otro banda tin e retonan pa proteha y conserva loke tin den parti di infrastructura y medio ambiente.

El menciona cu Gobierno desde varios aña caba a bin cu loke ta ruimtelijke ordening pa drecha e proceduranan cu tin den departamentonan di infrastructura y planificacion, cu segun el a sigura, a wordo neglisha y ta trece tambe cune casonan den corte y conflicto den diferente proyecto.

Importante ta, Lopez-Tromp a remarca cu e mehoracion lo sigui y nan ta tene na cuenta por ehempel cu 16 area cu tin cu keda proteha. Parlamento den un mocion di basta aña pasa a duna di conoce cu kier proteha e areanan en cuestion. Tambe mester tene cuenta di otro banda cu e cartera aki ta esun cu ta stimula economia, pa loke ta proyectonan, otorgamento di tereno cu ta un medio pa yega na proyectonan cu lo mehora calidad di bida, como tambe por crea trabou pa e habitantenan.

E areanan cu a wordo delinea cu lo tene na cuenta ta por ehempel, areanan cultural, huurgrond y tambe pa desaroya proyecto cu tin como meta pa stimula un economia di conocemento, creativo, cultura di nos pais y logistico, como waf y parti turistico pero di calidad.

Asina mes, el a informa cu e tabatin un reunion cu diferente departamento, na unda a pone enfasis riba mehora e servicio pa comunidad, pa motibo cu esey ta e luga unda e ciudadanonan ta yega na departamentonan pa entrega nan peticion y kier haya un procedura transparente.

Den e vision aki, Lopez-Tromp a trece dilanti e parti di medio ambiente, cu tin hopi discusion den comunidad riba situacion cu ta toca salud y con infrastructura tin un influencia riba e parti aki.

Tocante e reunion, el a bisa cu nan tin e meta pa haci e departamentonan aki no solamente mas servicial pa pueblo, sino tambe pa drecha e departamentonan pa clientenan y trahadonan, y asina trece training tambe pa e trahadonan pa nan por brinda un servicio miho ainda.

 

LEAVE A REPLY

Please enter your comment!
Please enter your name here