E ley nobo di Serlimar ta clarificacion di e ley existente. Esaki ta necesario pa asina por ancra e responsabilidad cu Serlimar tin encuanto bienestar general y pa percura cu tin un punto di salida cla y transparente pa tur otro compania y partner den e sector di recogemento y maneho di sushi.
Segun un comunicado di gobierno, e ley di Serlimar no ta solamente importante pa e diferente trayectonan cu nos tin cu encamina, sino cu e ta esencial! Pa yega na e maneho duradero di desperdicio y pa yega na cera dump Parkietenbos cu ta un problema medio ambiental y un calamidad wardando pa pasa.
Aruba a haya un señal cla y raspa di Pan American Health Organization a traves di un rapport publica, indicando cu e situacion no por sigui asina, y cu Aruba su ciudadanonan ta den peliger. Ademas esunnan cu ta traha na e sitio y cu ta bin den contacto cu e sitio ta mas ainda den riesgo pa dañonan cu tin di haber cu salud. P’esey Gobierno, a traves di Ministerio, a tuma e responsabilidad cu ta encera pasonan cu pa algun kisas no ta facil, pero sumamente necesario pa percura pa nos maneho di desperdicio cu ta na bienestar di henter Aruba.
Esaki ta e motibo pa cual e adaptacion di e ley existente ta di suma importancia y ta al caso, pa cual e lo tuma luga aworaki cual lo conduci na ceramento di dump na Parkietenbos, cu ta un peliger ambiental y pa salubridad publico na Aruba.
