Recientemente Minister Plenipotenciario Guillfred Besaril – den su afan pa topa cu algun grupo di studiantenan pa a caba di yega Hulanda – a bishita e grupo cu a bin pa studia na Utrecht. Esaki a tuma luga na comienso di nan programa di opvang na Centro di Conferencia Woudschoten. Tambe tabata presente coordinador di Enseñansa na Arubahuis James van der Linde, acompaña pa Rosalinda Croes-Kelly y Sharine Croes di Departamento di Enseñansa di Aruba (DEA).
E mandatario den su discurso na e studiantenan a enfatisa riba haya e balansa entre estudio y tempo liber. ‘Purba saca lo maximo di bo estadia na Hulanda. Estudio ta sumamente importante, pero banda di esey bo mester hiba un bida social pa asina trece balansa den bo bida. Esaki ta hopi bon pa bo desaroyo mental,’ asina Minister Plenipotenciario Besaril a bisa e studiantenan.
Besaril tabata hopi cla den su aviso pa e prome aña no bay Aruba cu vakantie. ‘E prome lunanan ta momentonan crucial pa bo estudio; bo enfoke mester ta riba esaki. Banda di esaki na e mesun momento bo mester cuminsa adapta na e bida na Hulanda.’
‘Disfruta di e opvang y purba na cera hopi amistadnan cu por ta hopi positivo den e prome aña. Hopi biaha esakinan ta amistadnan cu por ta duradero. Mi ta papia di mesun experencia dia cu ami a bin studia na Hulanda. Cu algun ainda e amistad t’ey,’ tabata e comentario di Minister Plenipotenciario Besaril.
E mandatario a bisa e studiantenan cu nan mester ta consciente di e hecho cu nan a caba un EPI, HAVO of VWO y esey ta nifica cu nan tin e potencial pa sigui un estudio avansa na Hulanda. Besaril: ‘Aruba a deposita confiansa den boso; saca probecho di esaki. Na otro banda tene cuenta cu boso lo encontra retonan riba boso caminda. No keda cana rond cu pregunta of problema, pero acerca bo mentor, miembronan di boso POC of Arubahuis. Bin padilanti cu bo problemanan pa bo por haya e ayudo necesario y na tempo.’
Finalmente Minister Plenipotenciario Besaril a gradici e mentor di Utrecht Omar Besaril y su POC pa e opvang na e studiantenan nobo y a desea e studiantenan tur clase di exito den nan estudio.
