Minister Guillfred Besaril (MEP)

Despues cu siman pasa a wordo anuncia cu algun studiantenan Arubiano a presenta sintomanan di Covid-19 despues di nan biahe pa Hulanda, minister Plenipotenciario Guillfred Besaril a ofrece un actualisacion di e situacion den dianan aki durante un conferencia di prensa ayera atardi na Den Haag.

Minister Besaril a trece dilanti cu e ‘Grupo di studiante 2020’ manera a keda conoci, 32 di nan a bay haci e prueba cu a resulta cu 9 a Sali positivo y 21 negativo, te ayera atardi tabatin dos prueba pendiente.

Di mesun manera, el a comenta cu miembronan di Cas di Aruba como mentornan y personal di Plaatselijke Opvang Commisie (POC) cu ta studiantenan cu ta studiando caba na Hulanda y cu ta sirbi como boluntario cu ta suma un total di 20 persona, a haci nan prueba cu e resultado di 17 negativo y 3 ta wardando pa e resultado.

Asina mes, minister Besaril a splica cu aworaki tin ‘un situacion preocupante y alarmante’ manera el a wordo a sigura, na unda a compronde for di diferente fuente cu otro studiantenan cu tin sintomanan di Covid-19 pero cu pa berguensa of cu no ta consciente di e gravedad di e circunstancianan a opta pa bay haci e test di un manera scondi.

Pa cu esaki, el a agrega cu e ley di privacidad na Hulanda ta hopi fuerte pa motibo cu ta trata di e privacidad di e persona, pero di otro banda, minister Besaril a expresa cu nan ta pertenece pa un grupo y cu e grupo ey cu a haya contacto cu e personanan aki tambe merece informacion si algun di nan tin e virus of no.

“E ora ey e cluster di e grupo aki ta bira cu nan ta plamando e virus na Hulanda”, algo cu nan ta purbando di contene, segun el a menciona.

Pa e motibo aki el a pidi pa esunnan cu a haci e prueba scondi pa trece dilanti su situacion, esey ta e unico manera pa nan por cuminsa haya e manera pa cu e virus no sigui plama na Hulanda.

Ademas, minister Besaril a trece dilanti cu nan a compronde cu un grupo di studiante ta organisando un fiesta pa celebra cu nan lo cuminsa studia na Hulanda, den esaki el a referi “señores, bo no ta caba di compronde den kico bo ta hinca?” el a apela cu ademas di tur e incidente cu a wordo haya na Aruba caba y en bes di keda trankil nan ta planeando un fiesta sin autorisacion di e autoridadnan competente responsabel di studiantenan mes na Hulanda.

El a reitera cu si el a haya sa ken ta e responsabel di esaki e mes lo bay denuncia e acto aki pa autoridadnan di Hulanda, pa motibo “cu ta inaceptabel y nos no por permiti cu esey lo sucede akinan na Hulanda”.

Minister Besaril a splica cu na Hulanda ora e personanan no ta tuma e medidanan necesario pa loke ta trata social distancing nan ta haya multa cu ta cuminsa for di 500 euro y negoshinan cu no ta cumpli cu esaki tambe ta haya multa for di 7.000 euro .

“Ora boso a dicidi di bin studia na Hulanda boso a bira un embahador di pais Aruba y ora boso ta haci malo nan ta recorda bo cu di Aruba bo ta bini”, y vooral den e crisis aki cu personal di Aruba Huis y otro miembronan di Opvang a expone nan mesun siguridad, di nan famia y esunnan cu ta rond di nan pa asina por duna apoyo pa grupo 2020 y duna nan un guia pa por lo menos nan sa ki caminda nan ta cana, “mi no ta kere cu ta husto pa tur di nos cu ta haci e trabou aki pa bo bin haci’e e cosnan aki cu tur e consecuencianan cu esey por trece cune”, minister Besaril a indica.

Tocante un articulo cu a Sali na rednan social di un medio di comunicacion local cu a entrevista un di e studiantenan cu na e momentonan aki ta na Hulanda y di e cual e no a duna su nomber, minister Besaril a considera cu tabata un articulo hopi positivo, el a manifesta cu den dianan aki e lo splica kico e ta e protocolnan y diferente scenarionan, cu tur hende tin cu compronde cu e situacion aki a bini for di e ‘second wave’ cu nan no tabata prepara pa esey cu tin hopi aspecto cu nan mester tene na cuenta cune pa asina ey por ta miho prepara den futuro.

1 COMMENT

  1. Berguensa ta cu esnan cu responsible pa studiantenan cu a bai studia na Hulanda, no a laganan test pa COVID-19 aki na Aruba, tresiendo asina e spreadmente di e Virus aki serca e groupo cu lo ta recibiendonan aja na Hulanda.

    Ta ki sorto di Menho tin aki na Aruba. esey ta Berguensa.

LEAVE A REPLY

Please enter your comment!
Please enter your name here