Durante su bishita di trabao na Hulanda, Minister di Finanzas y Cultura, Xiomara Maduro acompaña pa Minister President Evelyn Wever-Croes a reuni tambe cu Secretario di Estado Sra. Alexandra van Huffelen.

Banda di e topico financiero, a toca a parti cultural specialmente pa locual ta trata e trabaonan haci na Aruba pa no solamente conserva nos documentacion cu tin di haci cu nos historia, pero tambe haci nos herencia cultural mas accesibel pa comunidad.

Secretario di Estado Sra. Van Huffelen tabata recientemente na Aruba y a bishita nos Archivo Nacional di Aruba y su persona a tuma nota di e avancenan riba e parti di digitalisacion hunto cu e parti di nos Biblioteca Nacional kende a bin ta haciendo un trabao pionero pa locual ta digitalisacion y haci esaki accesibel na un publico grandi.

Durante e reunion cu Minister Maduro y Minister President Wever-Croes e mandatario Hulandes a trece dilanti cu e ta bao di e bon impresion pa locual ta trabaonan cu ta wordo haci y ta contento di mira cu Aruba a haya e presidencia di MOWLAC, cu ta e programa di UNESCO di Memory of the World Latin America and Caribbean.

Pais Aruba ta riba e stoel di presidencia y ta compartiendo cu e region tur e avancenan cu nos tin riba e parti pa haya documenta y tambe conserva e documentacion di nos herencia cultural y haci esaki accesibel pa medio di digitalisacion. E mandatario Hulandes a keda masha contento cu e reunion y e trabaonan cu ta wordo haci pa Aruba, segun un Gabinete Wever-Croes a publica riba su pagina di Facebook.