Diaranson mainta, minister di Husticia y Asuntonan Social Sr. Rocco Tjon a reuni cu e directiva di Aruba Hospitality & Security Foundation (AH&SF) tocante diferente proyecto den e area hotelero, specificamente tocante un proyecto nobo esta e “tourism patrol” pa amplia vigilancia den area hotelero.

Banda di esaki, a toca algun punto di preocupacion di pasado di parti di directiva di AH&SF. Sinembargo, e mandatario a splica con a tene cuenta cu e preocupacionnan aki pa den futuro nan no bolbe ripiti, y tambe con a tene cuenta cu esaki specificamente den e proyecto di camara di vigilancia. Pa e motibo aki, procesonan a wordo restructura pa asina remedia y preveni esaki den futuro. Actualmente, tin un comision cu ta dedica na esaki solamente.

Pa loke ta e proyecto di “Tourism Patrol”, esaki lo bira conhuntamente cu departamentonan hudicial, kendenan lo ta encarga pa haci e “background check”, di e personal cu lo bay eherce e tareanan aki. Na mes momento lo percura tambe pa nan haya diferente training pa loke ta “predictive profiling”, lo sigui e curso di Aruba Certification Program. Asina por bisa cu e intencion ta pa duna e personal aki tambe training pa nan por bira “bijzonder opsporings ambtenaar”.

E meta ta pa yega na vigilancia continuo den e area hotelero, caminda lo tin diferente turno di patruya na pia, riba bais y vehiculonan. E proyecto aki ta pa cubri e area di Arashi te cu Bushiri.

Pues, segun e mandatario, ta trata di un proyecto cu un impacto positivo pa pais Aruba y pa turismo, asina garantisando aun mas e siguridad di nos hendenan. A haci palabracionnan pa reuni na November binidero, pa asina amplia mas riba e proyecto aki y asina bin cu plannan concreto di con lo por logra realisa esaki na 2023.

LEAVE A REPLY

Please enter your comment!
Please enter your name here