Minister ta interveni den maneho diario di enseñansa pa empleo

minister di enseñansa Rudy Lampe (RED)

Mirando cu un rapport a sali unda segun minister di enseñansa servicio central di accountant di gobierno a constata cu tin ‘varios iregularidadnan’ den maneho di enseñansa pa empleo, el a dicidi di interveni directamente den e maneho diario y a kita autoridad di e directiva.

Awe mainta na conferencia di prensa di gobierno minister di enseñansa, ciencia y desaroyo sostenibel Rudy Lampe (RED) a trece dilanti cu pa awo e lo ta tumando encargo di maneho diario di departamento di enseñansa pa empleo debi na un evaluacion di servicio central di accountant (CAD).

Brevemente e minister a toca e tema aki, bisando cu tabatin varios iregularidadnan den e maneho financiero di enseñansa pa empleo cu e rapport di CAD a saca afo. P’esey el a dicidi pa ‘intermedia directamente’ den maneho diario di Enseñansa pa Empleo.

E intermediacion aki cu e minister a efectua lo ta na vigor te cu investigacionnan posterior determina con pa remedia e situacion. “Mi lo keda encarga cu e maneho diario y awe nos a manda e carta oficial unda nos ta kita e autorisacion di e directiva actual di enseñansa pa empleo pa por actua den nomber di e instancia.”

Minister a subraya cu e motivacion di esaki ta cu a firma e acuerdo di gobernacion enfocando riba practicanan di bon gobernacion, cual tambe ta conta pa enseñansa. “E ta algo sumamente importante pues nos lo sigui dedica tempo na duna informacion tocante control financiero mas estricto den henter e maneho di enseñansa.”

For di informacion no oficial cu Bon Dia Aruba a ricibi, por a comprende cu e directora di Enseñansa pa Empleo mes not a na altura di kico ta pasando. Un fuente ta confirma na Bon Dia cu e directora ta den proceso di baha cu pensioen. Ademas, segun e fuente tur cos financiero ta pasa via Directie Financien y cu Enseñansa pa Empleo no ta deal cu placa cash.

Bon Dia Aruba a acerca e minister concerni cu e info cu a ricibi pero no a logra di haya un contesta for di e minister. Tambe a purba tuma contacto directo cu e directora di Enseñansa pa Empleo pero no a logra y lo sigui purba durante dia di awe.

You May Also Like

Tres proyecto manera banchi electronico y delito contra moralidad a keda na laira

Stichting Reclassering no ta logra di haya suficiente fondo pa asina financia tres proyecto importante. ...

InselAir ta corta den su vuelonan

InselAir ta anuncia cu nan ta corta den nan vuelonan pa asina facilita e ...

detencion na turibana (4).jpg

Chauffeur bou influencia ta hera dal polis ariba quadracer na Turibana

Diadomingo anochi varios unidad di Noord y tambe di strand politie ta bay Turibana ...

ennia klein bon dia.jpg

Banco Central riba Ennia: no tin motibo pa intrankilidad

Banco Central di Aruba a bisa den un comunicado cu segun tur instrumento y ...

Bureau Rampenbestrijding Aruba lo bin cu sistema di alarma Alert FM

Bureau Rampenbestrijding Aruba ta informa comunidad di Aruba riba e sistema di alarma Alert ...

15siad.jpg

Departamento di Impuesto ta fabrica fechanan cu tin consecuencia legal

E ultimo dianan ciudadanonan ta hayando post atrobe di Departamento di Impuesto unda por ...