Durante conferencia di prensa, Minister di Husticia y Asuntonan Social, Rocco Tjon a anuncia cu Conseho di Minister a aproba un fondo di 600 mil florin pa asina cuminsa cu un proyecto dedica specialmente na atende cu e problematica di adictonan ambulante na Aruba.

“Awe mi ta para akinan cu hopi satisfaccion pa haci anuncio cu diabierna cu a pasa, Conseho di Minister a aproba 600 mil florin pa atende cu e problematica aki”, Tjon a expresa. El a sigui splica cu e fondonan aki lo wordo aloca pa Stichting FMAA, den futuro Stichting Hunto, hunto cu SPD por ehecuta e proyecto aki na un forma responsabel y un forma integral pa atende cu e fenomeno di adictonan ambulante riba caya.

Prome cu el a duna detaye di e fondonan y pa kico ta bay aloca esakinan specificamente, Minister Tjon a gradici tur e profesionalnan presente na e conferencia di prensa y tambe e stuurgroep GGZ. Manera ta conoci desaroyonan ta mustra cu mester cera e buraco cu tin entre aspectonan di salud mental y aspectonan di adiccion.

El a remarca cu e papia cu e profesionalnan tambe den e veld, mas y mas nan ta papia di un diagnostico dobel. Esaki kiermen cu clientenan no tin retonan riba un tereno so, e tereno di adiccion, pero nan tin reto tambe riba e aspecto di salud mental y p’esey tur e proyectonan aki ta nace practicamente for di e stuurgroep GGZ.

Minister a indica cu manera ta conoci ora cu wak e meerjarig beleidsplan (maneho multianual) di Ministerio di Husticia y Asuntonan Social, e proyecto aki, bemoeizorg, ta atende cu adictonan ambulante na un manera proactivo riba caya, ta forma parti di dje y ya caba a wordo anuncia na final di 2021 na momento cu nan mester trata presupuesto 2022.

“E bunita di e proyecto aki ta cu na un manera duradero lo bay atende cu e aspecto aki. Tin fondonan aloca cu a wordo aproba pa 2022”, el a agrega. El a sigui splica cu dia 1 di september e ekipo di profesionalnan lo mester inicia nan trabao, pero na mesun momento tambe e aprobacion ta conta cu e fondonan pa sigui usa tambe den 2023, cu e plan cu na 2024 Stichting Hunto lo haci e peticion a base di nan subsidio regular pa nan por sigui atende cu e fenomeno aki.

E fondonan aki ta nifica cu por emplea cinco profesional cu lo ta trahando riba e proyecto aki so di manera full-time. Esaki kiermen cu na un manera proactivo nan ta acerca e adictonan ambulante y ta percura pa nan wordo ubica den un di e centronan.

Pa loke ta e centronan, Tjon a splica cu na inicio esaki lo ta bay e centro na Meiveld, pero den cuadro di e proyecto aki tambe a aloca 100 mil florin pa renoba cuater camber na Centro Colorado y cuater camber ta nifica 16 pa 24 cama, caminda e adictonan ambulante por ricibi e ayudo necesario.

El a remarca cu obviamente mester tene cuenta cu diferente otro aspecto. Ora saca un persona for di caya mester percura pa brinda e cuido cu e tin mester di dje, pero di otro banda tambe tin aspectonan manera cuminda y aspectonan basico cu nan tin mester di dje tambe.

“Den cuadro cu e proyecto aki a tene cuenta cu tur e fondonan aki, manera mi a menciona, pa asina bo por atende na un manera duradero y na un manera structural cu e fenomeno aki”, el subraya.

Minister Tjon a indica cu esaki ta un di e parti nan, pero manera ta conoci tin e plan di vision a largo plaso. Esaki ta un aspecto cu e stuurgroep GGZ hunto cu PAHO (Organisacion Panamericano di Salud) a yega na dje, pero tin tambe e vision a corto plaso y medio largo plaso y e tipo di proyectonan aki ta nace for di e plannan aki.

El a comenta cu diaranson awo tambe tin un proyecto ta wordo lansa pa loke ta e proyecto infrastructural di Stichting Hunto caminda SPD hunto cu FMAA ta bay wordo ubica den un edificio hunto pa asina e procesonan ta miho alinea na otro y pa nan por brinda un miho cuido na tur esnan cu tin mester di esaki. No adultonan so, pero tambe na mucha y hobennan y dentro di poco tin mas proyectonan tambe ta bay wordo anuncia. El a comenta cu Fada tin algun proyecto cu ta bay wordo anuncia dentro di poco, SPD tambe y riba e tereno di opleiding tambe tin hopi iniciativa ta wordo ehecuta.

“600 mil ta wordo aloca pa por atende cu e parti di adictonan ambulante, sobre todo den e centronan di ciudad. Esaki obviamente lo eleva seguridad, lo baha e molester pa tur esunnan cu ta bishita nos centronan y e ta crea un miho bista den ciudad”, Minister Tjon a enfatisa.

Pa loke ta trata e ley cu tin aworaki cu no ta obliga ningun adicto pa registra na un centro of busca ayudo, pero mester haci esaki di manera boluntario, Minister Tjon a indica cu keto bay e leynan a keda mescos. El a menciona e plan strategico a largo plaso y a base di e plan ey tin diferente gruponan cu ta traha y un di e gruponan aki ta atende specificamente cu e parti di legislacion. El a subraya cu e procesonan legislativo ta tuma su tempo, pero e aspectonan ey tambe tin nan atencion.

El a agrega cu den diferente combersacionnan cu tur e profesionalnan den e veld, bemoeizorg ta un concepto prueba, aunke en berdad e ta boluntario, pero e profesionalnan cu ta bay ta encarga cu esaki lo haya un training ariba con mester ehecuta esaki.

“Un concepto prueba na Hulanda, un concepto prueba tambe na Boneiro caminda resultadonan di investigacionnan cientifico ta mustra bo tambe na momento cu abo como profesional logra convence e persona cu e mester di e ayudo a base di e hermentnan cu bo ta haya cu e training, e probabilidad cu e ta bay ta exitoso tambe den su rehabilitacion tambe ta mas grandi”, e minister a resalta.

LEAVE A REPLY

Please enter your comment!
Please enter your name here